Áskerı boryshyn ótegender UBT tapsyrmaı-aq joǵary oqý ornyna túse alady
ASTANA. KAZINFORM – Áskerı boryshyn ótegen azamattar arnaıy testileýden ótip, Ulttyq biryńǵaı testileýdi tapsyrmaı-aq joǵary oqý oryndaryna túse alady. Bul týraly Ortalyq kommýnıkatsııalar qyzmetinde ótken brıfıngide QR Qorǵanys mınıstriniń tsıfrlandyrý jónindegi orynbasary Darhan Ahmedıev málim etti.
Onyń aıtýynsha, bul múmkindik áskerı qyzmetshilerdi áleýmettik qoldaý sharalaryn tsıfrlandyrýǵa arnalǵan Sarbaz 2.0 aqparattyq júıesi arqyly júzege asyrylady.
— «Sarbaz 2.0» aqparattyq júıesi merzimdi áskerı qyzmetshilerge bilim berý jeńildikterin paıdalanýǵa jáne joǵary oqý oryndaryna túsý úshin ótkiziletin konkýrstyq irikteýge onlaın qatysýǵa múmkindik beredi. Qyzmetin aıaqtaǵan azamattar qoldanystaǵy qabyldaý tártibine sáıkes arnaıy testileýden ótip, UBT tapsyrmaı-aq joǵary oqý oryndaryna túse alady, — dedi Darhan Ahmedıev.
Onyń sózinshe, júıede memlekettik bilim granttaryna úmitkerlerdi irikteý úderisi avtomattandyrylǵan.
Aqparattyq júıe áskerı qyzmet nátıjeleri men jaýyngerlik daıarlyqtaǵy jetistikter negizinde úmitkerlerdi ádil ári obektıvti baǵalaýdy qamtamasyz etedi. Joǵary kórsetkishke qol jetkizgen áskerı qyzmetshilerge tegin bilim alý múmkindigi berilip, jataqhanadan oryn usynylady.
Sondaı-aq platforma qatysýshylardyń ortalyqtandyrylǵan esebin júrgizýge jáne árbir áskerı qyzmetshiniń tsıfrlyq profılin qalyptastyrýǵa múmkindik beredi.
Darhan Ahmedıevtiń málimetinshe, 2023 jyly iske qosylǵan Sarbaz 2.0 júıesinde búginge deıin 180 myńnan astam áskerı qyzmetshi tirkelgen.
Aıta keteıik, jýyrda Qurlyq áskerlerinde úsh myńnan astam jas sarbaz áskerı ant qabyldady.
