Áskerı bólimshelerge jasandy ıntellektisi bar beınebaqylaý nege kerek

ASTANA. KAZINFORM — QR Qorǵanys mınıstriniń orynbasaryDarhan Ahmedıev áskerı bólimshelerge jasandy ıntellekti júıesi bar beınebaqylaýdy engizý men sarbazdardyń analarynan túsken aryz-shaǵymǵa qatysty túsinik berdi.

— Prezıdent tıisti tapsyrmany berdi, al Bas prokýratýra tıisti jumysty bastap ketti. 23 qarashada aryz-shaǵymdardy qarastyrýdyń nátıjesi jarııalanady, — dedi D. Ahmedıev Parlament Májilisinde tilshiler suraǵyna jaýap bere otyryp.

Onyń aıtýynsha, zańsyz árketterge jol bermeý maqsatynda barlyq áskerı bólimderde beınebaqylaý júıesi ornatylǵan.

— Biraq onyń bárine jasandy ıntellekti júıesin engizý jumysy bólinetin qarajatqa baılanysty bolmaq. Mınıstrdiń tapsyrmasy boıynsha keler jyly osy máseleni tolyq sheshýim kerek. Sondyqtan qazir Qarjy mınıstrligimen osy baǵytta tıisti is-qımyldardy júzege asyryp jatyrmyz, — dedi Qorǵanys mınıstriniń orynbasary.

Onyń sózine qaraǵanda, jasandy ıntellekti qosylsa, Face ID arqyly bólimshede júrgen adamdarǵa qatysty tolyq baqylaý bolady.

— Ol júıe jumysqa kelgen áskerılerdiń sanyn, olardyń kirgen ýaqytyn, qyzmet ornynda kimderdiń turǵanyn, qoımaǵa ruqsaty bar adamdardyń kirýin, toptasyp jınalǵan áskerıler turǵan oryndy, qulaǵan sarbazdardy, dárethanadan uzaq ýaqyt boıy shyqpaı jatqan adamdardy anyqtaıdy. Bul júıe tolyqtaı iske qosylsa, áskerdegi tártipke ońtaıly áser etetinine senemin. «Aqyldy» kameralar arqyly kóptegen problemadan qutylamyz. Osy vıdeodaǵy derekter áskerı polıtsııaǵa joldanady. Sonymen qatar, keıbir analıtıka áskerı bólimsheniń ózine jiberiledi, — dedi Darhan Ahmedıev.

Aıta keteıik, 10 qarasha kúni Prezıdent áskerde qaza tapqan sarbazdardyń analarynan túsken aryz-shaǵymdy 12 kún ishinde qarastyrý kerek ekenin aıtyp, Bas prokýrorǵa tıisti tapsyrma berdi.

Óz kezeginde Bas prokýror Berik Asylov Bas prokýratýra men Bas áskerı prokýratýra basshylyǵy qaza tapqan jáne jaraqat alǵan áskerı qyzmetshilerdiń analaryn qabyldaıtynyn málim etti.