Áskerı bólimshelerdegi «shved ústeli»: jańa júıe jappaı engizilýi múmkin
ASTANA. KAZINFORM — QR Qorǵanys mınıstriniń orynbasary Darhan Ahmedıev áskerı bólimshelerdegi ashanalarda «shved ústeli» qaǵıdatyn engizýge qatysty túsinik berdi.
— Bul jańa júıe pılottyq joba retinde engizilgenin naqty aıta alamyn. Qazir osy jobanyń ońtaıly jáne teris tustary taldaýdan ótip jatyr. Atap aıtqanda, kez kelgen jańa erejeni jappaı engizer aldynda synaqtan ótkizý kezeńi bolýy tıis. Meniń oıymsha, osy taldaý jumystarynan keıin tıisti sheshim qabyldanyp, «shved ústeli» jappaı engiziledi dep oılaımyn, — dedi Darhan Ahmedıev Parlament Májilisinde tilshiler suraǵyna jaýap bere otyryp.
Buǵan deıin Qazaqstan Qarýly kúshterinde áskerı qyzmetshilerdi tamaqtandyrý júıesin jańǵyrtýǵa baǵyttalǵan jańa standarttar engizilip jatqanyn jazǵan edik.
Qorǵanys mınıstrliginiń málimetinshe, jańartýdyń negizgi elementteriniń biri — áskerı qyzmetshilerge birneshe taǵamnyń ishinen tańdaý jasaýǵa múmkindik beretin «shved ústeli» qaǵıdatyn engizý. Jańa model boıynsha sarbazdar kún saıyn birneshe túrli birinshi jáne ekinshi taǵamnan óz qalaýy boıynsha tańdaı alady. Bul rette azyq-túlik paıynyń quny ózgermeıdi. Júıe taǵam daıyndaý men taratý protsesterin ońtaılandyrý esebinen iske asyrylady.
Jańashyldyq aıasynda ulttyq taǵamdarǵa da basymdyq berilip otyr. Áskerı bólimderde «ulttyq taǵamdar kúni» engizilip, mázirge mampar, qýyrdaq, palaý, et jáne baýyrsaq sııaqty dástúrli as túrleri qosylǵan.
