Áskerı bólimderde Jańarý kúni aıasynda tazalyq pen aǵash otyrǵyzý sharalary ótkizildi
ASTANA. KAZINFORM – Naýryznama aıasyndaǵy Jańarý kúni – ekologııalyq mádenıetti qalyptastyrýǵa baǵyttalǵan mańyzdy kúnderdiń biri. Bul kúni óńirlerde jappaı aǵash otyrǵyzý aktsııalary uıymdastyrylyp, tazalyq senbilikteri ótkiziledi.
Tabıǵatty qorǵaý ıdeıasyn dáriptep, qoǵamdaǵy birlik pen jaýapkershilikti arttyrýǵa yqpal etetin mundaı is-sharalar Qarýly kúshterdiń áskerı bólimderi men mekemelerinde de júzege asyryldy. Jańarý kúnine oraı Jetisý garnızonynda ótken kógaldandyrý aktsııasyna Qorǵanys mınıstriniń tárbıe jáne ıdeologııalyq jumystar jónindegi orynbasary general-maıor Asqar Mustabekov qatysty.
«Juldyz» yqsham aýdanyndaǵy áskerı jataqhana mańynda uıymdastyrylǵan aýmaqty abattandyrý jáne aǵash kóshetterin otyrǵyzý jumystaryna áskerı qyzmetshiler, olardyń otbasy músheleri, sondaı-aq «Jetisý tarlandary» áskerı-patrıottyq klýbynyń tárbıelenýshileri jumyldyryldy.
Mınıstrdiń orynbasary Naýryz merekesiniń taǵylymy mol tárbıelik mańyzynyń biri – tabıǵatty aıalap, jasyl jelekti saqtaý ekenin atap ótti.
– Tabıǵatty qorǵaý – bárimizdiń ortaq mindetimiz. Ulystyń uly kúni dástúr boıynsha aryqtar tazalanyp, jas aǵash kóshetteri otyrǵyzylady. «Jańa kún», «jańarý» degen maǵynasyna sáıkes, barlyq jaqsylyq osy kúnnen bastaý alyp, jan tazalyǵymen qatar qorshaǵan ortanyń tazalyǵyn saqtaýdan kórinis tabady. Áskerı qyzmetshilermen birge qala turǵyndary da osy ıgilikti iske atsalysty, - dedi ol.
Aktsııa barysynda 20-ǵa jýyq túrli jemis aǵashy otyrǵyzyldy. Áskerı qyzmetshiler mundaı bastamalardyń tabıǵatty qorǵaý mádenıetin qalyptastyryp qana qoımaı, qoǵam birligin nyǵaıtýǵa yqpal etetinin dáleldedi.
Mundaı ıgi is-shara Aqtaý garnızonynda da jalǵasyn tapty. Áskerı-teńiz kúshteri gıdrografııalyq qamtamasyz etý qyzmetiniń jeke quramy áskerı bólim aýmaǵynda jáne Túpqaraǵan aýdanyndaǵy Qyzylózen maıagy mańynda júzge jýyq tal men gúl otyrǵyzyp, aýmaqty abattandyrý jumystaryn júrgizdi.
– Búgingi aktsııa barysynda óńirdiń klımatyna saı keletin jas aǵashtar men gúlder egildi. Kóshetterdi durys otyrǵyzý olardyń tez tamyr jaıyp, ósip ketýine múmkindik beredi. Sonymen birge, Jańarý kúnine oraı uıymdastyrylǵan bul is-sharada jeke quram ózderiniń eńbekqorlyǵyn, birligi men dostyq qarym-qatynasyn taǵy bir márte kórsetti, - dedi gıdrografııalyq qamtamasyz etý qyzmeti bastyǵynyń tárbıe jáne ıdeologııalyq jumystar jónindegi orynbasary 3-dárejeli kapıtan Erlan Sabıǵat.
Shymkent garnızonyndaǵy 35748 áskerı bóliminde de aǵash egý aktsııasy uıymdastyryldy. Jeke quram bólim aýmaǵyna 100-den astam aǵash otyrǵyzdy.
Áskerı qyzmetshilerdiń qatysýymen ótkiziletin tazalyq aktsııalary men kógaldandyrý baǵytyndaǵy jumystar aldaǵy ýaqytta da jalǵasyn tabady.
Budan buryn Jańarý kúnine oraı elde qandaı mádenı sharalar ótetinin jazǵan edik.
