Áskerı bólimderde zamanaýı IT júıelermen beınebaqylaý ornatylady - Bas prokýror

ASTANA. KAZINFORM – Bas prokýror Berik Asylov áskerı bólimderde zamanaýı IT júıelermen beınebaqylaý ornatylatynyn habarlady.

- Qasym-Jomart Kemeluly Toqaevtyń aıtýynsha, áskerı qyzmetshilerdiń ómiri men densaýlyǵyn saqtaý – barlyq deńgeıdegi qolbasshylyq jumysynyń basym baǵyty bolýy tıis. Áskerı qyzmet qaýipsizdik, abyroı, tártip pen ádilet qaǵıdattaryna negizdelýi qajet.

Osy qaǵıdalardy basshylyqqa ala otyryp, Bas áskerı prokýratýraǵa Qarýly Kúshtermen, basqa da áskerler men áskerı qurylymdarmen birlesip eki jańa jobany engizýdi tapsyrdym:

• «Áskerdegi zań jáne tártip»,
• «Tsıfrlyq profılaktıka».

Maqsat – árbir áskerı qyzmetshi qorǵalǵan, al komandır senim men qoldaýǵa ıe bolatyn júıeni qalyptastyrý, - dep jazdy Berik Asylov H jelisinde.

Ol eń aldymen áskerı bólimderde zamanaýı IT júıelermen beınebaqylaý ornatylatynyn málimdedi. Osylaısha, jasandy ıntellekt tehnologııalaryn engizý arqyly jaǵdaıdy avtomatty túrde taldap, jeke quramnyń qaýipsizdik deńgeıin arttyrý kózdelýde.

- Komandırlerdi (dalalyq jattyǵýlarda, atys kezinde, oqý-jattyǵýlarda) jáne qaraýyldaǵy jáne jaýyngerlik kezekshiliktegimerzimdi qyzmettegi sarbazdardy beınejetondarmen jaraqtandyrý josparlanýda. Bul qyzmetti ótkerý barysynda naqty ári úzdiksiz baqylaý júrgizýge múmkindik beredi.

Qazirdiń ózinde armia.kz saıtynda tsıfrlyq keńesshi iske qosyldy. Sonymen qatar jańa baılanys arnalary engizilýde — árbir sarbaz qaıda júginý kerektigin bilip, oǵan nazar aýdarǵanyna senimdi bolýy tıis, - delingen Bas prokýrordyń jazbasynda.

Sondaı-aq, ashyqtyqty qamtamasyz etý maqsatynda áskerı shaqyrý jáne medıtsınalyq komıssııa otyrystaryn aýdıo-beıne tirkeý, hattamalardy tsıfrlandyrý jáne olardy shaqyrylýshylardyń ózderine qashyqtan qoljetimdi etý máseleleri pysyqtalýda. Bul — medıtsınalyq qarsy kórsetilimderi bar azamattardy merzimdi qyzmetke shaqyrýdyń aldyn alady.

- Osy jáne ózge de sharalar — áskerı qyzmet atqarý kezinde sarbazdardyń qaýipsizdigin qamtamasyz etýge baǵyttalǵan tıimdi tetikter bola alady, - deıdi Berik Asylov.

Buǵan deıin nelikten keıbir azamat áskerge kúshtep jetkiziletinin jazǵan edik.