Áskerı qyzmetshiler bálish, býrger, pıtstsaǵa tapsyrys bere alady
ASTANA. KAZINFORM — Merzimdi qyzmettegi áskerı qyzmetshilerdiń saýda-turmystyq qamtamasyz etý júıesin damytý maqsatynda QR Qarýly kúshteriniń Tyl bastyǵy basqarmasy Voenmart pılottyq jobasyn iske asyrýdy bastady.
Qazirgi ýaqytta bul joba Almaty oblysyndaǵy 78460 áskerı bóliminde, Gvardeısk garnızonnyń oqý ortalyǵynda, Astanadaǵy 68665 áskerı bóliminde jáne Saǵadat Nurmaǵambetov atyndaǵy áskerı kolledjde engizildi. Atalǵan áskerı bólimderde tapsyrys rásimdeý úshin jetkizýshi tarapynan tegin negizde termınaldar men planshetter ornatyldy. Aldaǵy ýaqytta planshetter áskerı bólimderdiń balansyna beriledi.
— Voenmart — áskerı turmysty uıymdastyrýdyń jańa deńgeıi. Tsıfrlyq formattyń arqasynda áskerı qyzmetshiler qajetti taýarlarǵa yńǵaıly ári jedel qol jetkize alady. Bul áskerı qyzmet jaǵdaılaryn jaıly etip, zamanaýı talaptarǵa sáıkestendirýge múmkindik beredi, — dedi QR Qorǵanys mınıstrligi Aqparattyq tehnologııalar departamenti bastyǵynyń orynbasary podpolkovnık Almat Mahanov.
Voenmart júıesi sarbazdarǵa qajetti taýarlarǵa tapsyrys berip, olardy áskerı bólim aýmaǵyna tegin jetkizý múmkindigin beredi. Sonymen qatar jetkiziletin ónimderdiń sapasyn baqylaýdyń kóp deńgeıli júıesi qarastyrylǵan. Sondaı-aq tapsyrystardy esepke alý men baqylaýdyń ashyq júıesi jumys isteıdi. Ol óz kezeginde áskerı qyzmetshiler rásimdegen tapsyrystardy baqylaýǵa múmkindik beredi.
Áskerı bólimderdegi dástúrli saýda núktelerinen aıyrmashylyǵy — Voenmart assortımenti aıtarlyqtaı keńeıtilgen. Munda jeke gıgıena quraldary, tigin buıymdary jáne basqa da qajetti zattarmen qatar, áskerı qyzmetshilerge jańa pisken jemister, shyryndar, tanymal tiskebasarlar, nan ónimderi jáne kúndelikti suranysqa ıe basqa da taýarlar qoljetimdi.
Jobanyń basty erekshelikteriniń biri — ystyq taǵamdardy jetkizý qyzmetiniń uıymdastyrylýy. Áskerı qyzmetshiler bálish, býrger, pıtstsa jáne basqa da taǵamdarǵa tapsyrys bere alady, ári olar ystyq kúıinde jetkiziledi.
Bul jerde mańyzdy artyqshylyqtardyń biri — jetkizýdiń tegin bolýy. Áskerı qyzmetshiler qosymsha komıssııalar men qyzmet kórsetý tólemderinsiz tek taýardyń óz baǵasyn ǵana tóleıdi. Bul qyzmetti sarbazdar úshin barynsha qoljetimdi etýge múmkindik beredi.
Pılottyq joba nátıjesi boıynsha onyń tıimdiligi baǵalanyp, keıinnen Voenmart júıesin Qazaqstan Qarýly kúshteriniń basqa da áskerı bólimderine kezeń-kezeńmen engizý múmkindigi qarastyrylady.
Aıta ketelik Ulttyq ulanda áskerı polıtsııanyń jedel jelisi iske qosylǵan edi.
