Áskerı bólimde tsıfrlandyrý: sarbaz ázirlegen portal 500 jumys saǵatyn únemdeıdi
ASTANA. KAZINFORM — Memleket basshysy aıqyndaǵan tsıfrlandyrý jáne jasandy ıntellektini damytý baǵyty aıasynda QR ІІM Ulttyq ulanynda zamanaýı tehnologııalyq sheshimder kezeń-kezeńimen engizilýde. Osy baǵyttaǵy kezekti joba 5573 áskerı bóliminde júzege asyryldy. Munda merzimdi áskerı qyzmettiń sarbazy Kım Hen Ý aqparattyq portal ázirledi.
Jańa tsıfrlyq resýrs áskerı bólimniń qyzmetin ońtaılandyrýǵa baǵyttalǵan. Búginde ol birqatar qyzmettik úderisterdi avtomattandyryp, ýaqyt shyǵynyn edáýir qysqartýǵa múmkindik berdi.
Joba avtory – Almaty qalasynyń týmasy, qatardaǵy Kım Hen Ý. Ol «Aqparattyq tehnologııalar» mamandyǵyn meńgerip, alǵan bilimin áskerı qyzmet barysynda tıimdi qoldanǵan. Aldaǵy ýaqytta «Sarbaz 2.0» baǵdarlamasy aıasynda bilim berý grantyn ıelenip, kásibı biliktiligin jetildirýdi josparlap otyr. Tsıfrlyq sheshimderdi engizýge degen qyzyǵýshylyǵy oǵan áskerı bólimniń ishki úderisterin jetildirý jumysyna belsendi aralasýǵa múmkindik berdi.
Aǵa ofıtserlerdiń jetekshiligimen ulandyq áskerı bólim qyzmetine taldaý júrgizip, tsıfrlyq sheshimderdi qajet etetin baǵyttardy aıqyndady. Zertteý nátıjesinde aqparat almasý júıesin damytýǵa erekshe nazar aýdarý qajettigi anyqtaldy. Nátıjesinde buǵan deıin negizinen saptyq alańda jetkiziletin mańyzdy málimetter endi portal arqyly jedel jarııalanatyn boldy.
Bul qujat aınalymyn jeńildetip, buıryqtardyń ýaqtyly jańartylýyn jáne derekterdiń ózektendirilýin qamtamasyz etti. Psıhologııalyq qyzmettiń jumysyna da erekshe kóńil bólindi. Kım Hen Ý-dyń qatysýymen merzimdi áskerı qyzmetshilerdi testileý nátıjelerin avtomatty túrde óńdeıtin algorıtm ázirlendi. Áskerı psıhologtardyń aıtýynsha, engizilgen sheshim jarty jyldyń ishinde shamamen 500 jumys saǵatyn únemdeýge múmkindik bergen.
– Ásker men úshin naǵyz shyńdalý mektebine aınaldy. 5573 áskerı bóliminde merzimdi áskerı qyzmetshiler úshin barlyq jaǵdaı jasalǵan. Tártip pen joǵary talaptardyń arqasynda ózin-ózi damytýǵa kóp múmkindikter bar. Merzimdi áskerı qyzmettiń bir jylyn barynsha tıimdi paıdalanyp, jańa kásibı daǵdylardy meńgerýdi kózdep otyrmyn, – dedi ulandyq.
Sarbaz Kım aldaǵy ýaqytta da bólimniń jaýyngerlik qyzmetin uıymdastyrý úderisterin jeńildetýge baǵyttalǵan jańa tsıfrlyq sheshimderdi engizýdi josparlap otyr. Basty maqsat – qyzmettiń jedeldigin arttyryp, áskerı qyzmetshiler men sarbazdarǵa qolaıly orta qalyptastyrý.
Aıta keteıik, buǵan deıin Ulttyq ulan hory reseılik shoýdy shýlatqanyn jazǵan edik.