Áskerı bólimsheni Málik Ǵabdýllınniń atymen ataý bastamasy aıaqsyz qalyp keledi - senator
ASTANA. QazAqparat - Búgin QR Parlamenti Senatynyń jalpy otyrysynda senator Jabal Erǵalıev Úkimet basshysy Baqytjan Saǵyntaevtyń atyna depýtattyq saýalynda áskerı bólimsheni Málik Ǵabdýllınniń atymen ataýdy surady, dep habarlaıdy QazAqparat.
«Keńes Odaǵynyń Batyry atanǵan, Keńes Odaǵy men Reseıdiń Ǵylym akademııalarynyń akademıgi, Qazaqstannyń ǵylymyna eńbek sińirgen qaıratkeri, jazýshy, ádebıet zertteýshi, pedagog, fılologııa ǵylymdarynyń doktory, professor, Memlekettik syılyqtyń laýreaty, kórnekti memleket jáne qoǵam qaıratkeri, halqynyń júreginde úlken iz qaldyrǵan Málik Ǵabdýllınniń esimi men erligi, adamgershilik qasıetteri óz tusynda da ańyzǵa aınalǵan bolatyn. Kórnekti qoǵam qaıratkeriniń jáne ataqty ǵalymnyń erligin, otansúıgishtigin, qarapaıymdylyǵyn endigi arada Elbasynyń «Bolashaqqa baǵdar: rýhanı jańǵyrý» eńbegindegi qaǵıdattarǵa saı nasıhattaýdyń jańa múmkindigi týyp otyr. Osy oraıda ol Astanada Málik Ǵabdýllınniń eskertkishin qoıý máselesi qarastyrylsa etti», - dep toqtaldy depýtat.
Sonymen qatar senator Kókshetaý qalasyndaǵy batyrdyń respýblıkalyq murajaıy talapqa saı jaýap beretin osy zamanǵy qor saqtaý qoımasyna da zárý bolyp otyrǵandyǵyn jetkizdi.
«Kezinde depýtattyq saýalymyzǵa oraı Táýelsiz elimizdiń áskerı bir bólimshesin Keńes Odaǵynyń Batyry Málik Ǵabdýllınniń esimimen ataý qajet degen usynysymyzǵa oraı, 2014 jylǵy 14 qańtardaǵy Úkimettiń Saryózek qalashyǵyndaǵy áskerı bir bólimsheni M. Ǵabdýllınniń atymen ataımyz degen jaýaby da aıaqsyz qalyp keledi. Keńes Odaǵynyń Batyrynyń esimi men erligin Máńgilik Eldiń máńgilik urpaqtarynyń sanasyna qaldyrýǵa qajetti ıgi ister áli de óz jalǵasyn tabar degen senimdemiz»,-dep atap ótti J. Erǵalıev.
