Áskerı bólimdegi órtke baılanysty laýazymdy tulǵalar jazalanatyn boldy

ASTANA. QazAqparat - Astana mańyndaǵy Qyrqynshy stantsııasynda ornalasqan Qorǵanys mınıstrliginiń 68665 áskerı bólimindegi órttiń sebebi anyqtalǵan soń, órt qaýipsizdigin saqtamaǵan laýazymdy tulǵalar jazalanatyn boldy. Bul týraly QazAqparat agenttiginiń resmı sýalyna jaýap bere otyryp, QR Qorǵanys mınıstrliginiń baspasóz qyzmeti habarlady.

«2016 jyldyń 6 qazanynda 68665 áskerı bóliminiń jabyq tırinde AK-74 avtomatynan oq atý boıynsha praktıkalyq sabaq ótkizý kezinde tır ǵımaratynda órt shyqty. Órttiń jalpy aýdany 300 sharshy metrdi qurady. Mert bolǵandar men zardap shekkender joq. Materıaldyq shyǵynnyń kólemi anyqtalyp jatyr»,-dep jaýap berdi mınıstrliktiń baspasóz qyzmeti.

Osy oqıǵaǵa baılanysty quqyq qorǵaý organdary men Qorǵanys mınıstrliginiń jaýapty qyzmetkerleri tergeý júrgizip jatyr.

«Qazirgi ýaqytta quqyq qorǵaý organdarymen tergeý júrgizilip, órttiń shyǵý sebebi anyqtalýda. Tergeý qorytyndysy boıynsha órt qaýipsizdigin buzýǵa jol bergen laýazymdy adamdar jaýapqa tartylatyn bolady», - dep habarlady derekkózi.

Esterińizge sala keteıik, 11 kún buryn, ıaǵnı 6 qazanda QR Qorǵanys mınıstrliginiń 68665 áskerı bóliminde (Aeroutqyr áskeriniń 36-shy desanttyq-shabýyldaý brıgadasy) úlken órt shyqqan. Astana qalalyq Tótenshe jaǵdaılar departamentiniń baspasóz qyzmeti habarlaǵandaı, tańǵy saǵat 10:00 shamasynda bastalǵan órtti arada úsh saǵat ótken soń aýyzdyqtalǵan.