Áskerı bólim komandırleri 10 kún boıy emtıhandar tapsyrady

ASTANA. 24 qańtar. QazAqparat - Qazaqstan Qarýly Kúshteriniń Qurlyq áskerlerinde komandırlik daıyndyq boıynsha ofıtserler jıyny bastaldy. Oǵan ásker túrine qarasty bólimder men quramalardyń komandırleri tartylǵan. QR QM baspasóz qyzmetiniń málimetine qaraǵanda, jıyndy ótkizý orny retinde Astana qalasy men Qurlyq áskerleriniń oqý ortalyǵy ornalasqan Gvardeısk garnızony belgilenip otyr.

Áskerı bólim komandırleri 10 kún boıy áskerlerdi qoldaný máseleleri, jaýyngerlik ázirlikti uıymdastyrý jáne basqa da taqyryptar boıynsha synaqtar men emtıhandar tapsyrady.

Buǵan deıin komandırlik daıyndyqtar bólimder ornalasqan jerlerde ǵana ótkiziletin. Bıyl ekinshi jyl bul sekildi jıyndar kýrstyq daıyndyq ádisimen belgilengen jıyn beketterine shyǵý arqyly ótkizilip keledi.

Komandırlerdi jańa ádispen testileý ıdeıasynyń avtory Qurlyq áskerleriniń bas qolbasshysy general-leıtenant Murat Maıkeev komandırlik daıyndyq boıynsha osyndaı tásilmen synaqtar ótkizý óte tıimdi deıdi. Sebebi olardyń bilimi men biligin joǵary turǵan shtab ofıtserleri baǵalaıdy. Sol sebepti de komandırler synaqqa óte muqııat daıyndalyp keledi. Bul tásil olardyń kásibı deńgeıin meılinshe durys baǵalaýdy qamtamasyz etetin bolady.

Qurlyq áskerleri bas qolbasshysynyń basqarmasyndaǵylar jıyn barysynda komandırler tájirıbe almasyp, jaýyngerlik daıyndyq pen bólimniń kúndelikti qyzmetin uıymdastyrýdaǵy ádis-tásilderin ózara bólisetin bolady deıdi. Sonymen qatar, synaqtardy tikeleı qadaǵalaý arqyly ásker túriniń bas qolbasshysy baǵynysyndaǵy komandırlerdiń kásibı ósý qarqynyn baqylaýǵa múmkindik alady.