Áskerı bilim berý ordalarynda jańa ınteraktıvti oqytý júıesi engizildi
ASTANA. Qyrkúıektiń 1-i. QazAqparat /Jasulan Amanbaıuly/ - Respýblıkadaǵy áskerı bilim berý mekemeleri Mýltıservıstik aqparattyq-bilim berý ortasy júıesimen jabdyqtalǵan.
Búgin QR Qorǵanys mınıstriniń orynbasary, General-maıor Nurlan Jolamanov Astanadaǵy Armııa generaly Saǵadat Nurmaǵambetov atyndaǵy Respýblıkalyq «Jas ulan» mektebinde jańa júıeniń tanystyrylymyn jasady, dep habarlaıdy QazAqparat.
Vıtse-mınıstrdiń aıtýynsha, bul júıe biryńǵaı aqparattyq-bilim berý ortasyn qurýǵa baǵyttalǵan. Mýltıservıstik aqparattyq-bilim berý ortasy júıesi - oqý oryndarynyń bir-birimen ınternet arqyly beıne baılanys ornata alady. Sonymen qatar sabaq materıaldaryn bir bazaǵa sandyq negizde jınaqtap otyrýǵa bolady. Oǵan 2007 jyldan beri kezeń-kezeń boıynsha 1 mlrd. astam teńge jumsalǵan.
«Jańadan engizilgen mýltıservıstik aqparattyq-bilim berý ortasy júıesi barlyq áskerı bilim berý mekemelerinde engizilgen. Ol qazirgi ýaqytta bilim úderisin qamtamasyz etip otyr. JOO-nyń qorynda bar oqý materıaldaryn ınternet jelisi arqyly barlyq bilim ordalary alyp paıdalana alady. Júıe mamandarǵa tıimdi ári sapaly bilim berýge múmkindik beredi», deıdi N. Jolamanov.
Júıe arqyly áskerı oqý oryndarymen ınteraktıvti beıneselektor jıynyn ótkizgen N. Jolamanov eldegi oqý oryndaryna úndeý jarııalap, oqý protsesin jetildirýge qatysty birqatar tapsyrmalar berdi.
