Áskerı bıletti berý jáne áskerı esepke alý úderisi: elimizde qandaı ózgerister engiziledi
ASTANA. KAZINFORM — Qorǵanys mınıstrligi áskerı mindettiler men áskerge shaqyrylýshylardy áskerı esepke alý qaǵıdalaryna ózgerister engizdi. Áskerı bıletterdi berý tártibine, áskerı qyzmet týraly málimetterdi túzetýge jáne memlekettik qyzmetter kórsetýge qatysty ózgeristerdi nazaryńyzǵa usynamyz.
Jańa qaǵıdalarǵa sáıkes, beıbit ýaqytta áskerı bıletter Qarýly kúshterge, basqa da áskerler men áskerı quralymdarǵa áskerı qyzmetke nemese áskerı jıyndarǵa shaqyrylǵan azamattarǵa beriledi. Sondaı-aq, áskerı jáne arnaýly oqý oryndaryna túsken, aqyly negizde áskerı daıarlyq rezervinen ótken nemese zapastaǵy ofıtserler men serjanttardy daıarlaýdyń tolyq kýrsynan aıaqtaǵan azamattarǵa da áskerı bılet beriledi.
Áskerı bıletterdi oblystyq mańyzy bar aýdandar men qalalardyń qorǵanys isteri jónindegi basqarmalary da beredi. Ony belgilengen eńbek sińirý merzimin ótegennen keıin áskerı qyzmetten, quqyq qorǵaý, arnaýly memlekettik organdar men azamattyq qorǵaý organdaryndaǵy qyzmetten bosatylǵan azamattar ala alady.
Bul tártip buryn belgilengen merzimde qyzmet ótkerip, bas bostandyǵynan aıyrý oryndarynan bosatylǵan adamdarǵa, tıisti qyzmetti ótkergennen keıin basqa memleketterden kelip, Qazaqstan azamattyǵyn alǵan azamattarǵa, sondaı-aq áskerı ataǵy qalpyna keltirilgen adamdarǵa da qoldanylady.
Áskerı jáne arnaýly oqý oryndaryna túsken azamattarǵa áskerı bılet berýdiń jeke tártibi qarastyrylǵan. Qatardaǵy jaýyngerler men serjanttarǵa arnalǵan áskerı bıletterdiń blankilerin oqý oryndarynyń qabyldaý týraly buıryqtarynan alynǵan úzindiler negizinde joldaǵan suraý salýy boıynsha qorǵanys isteri jónindegi basqarmalar beredi.
Qujattardy alǵannan keıin basqarmalar Qorǵanys mınıstrliginiń Ortalyq júıesi arqyly azamattarǵa buryn áskerı bılet berilgen-berilmegenin tekseredi. Eger azamat buryn mundaı qujat almaǵan bolsa, áskerı bılet blankisi toltyrylyp, berý tizimdemesi jasalady. Sodan keıin ol áskerı bıletpen birge oqý ornyna jiberiledi.
Tizimdeme eki danada jasalady. Ekinshi danasy berilmegen blankilermen birge qujattar tapsyrylǵan kúnnen bastap 10 jumys kúninen keshiktirilmeı qorǵanys isteri jónindegi basqarmaǵa qaıtarylýy tıis. Eger azamattyń áskerı bıleti burynnan bar bolsa, onyń elektrondyq esep kartochkasyndaǵy mártebe «Áskerı jáne arnaýly oqý oryndaryna túsýine baılanysty esepten shyǵaryldy» dep ózgertiledi.
Túzetýler jeke derekter ózgergen kezde áskerı bıletterdegi málimetterdi jańartýdy da kózdeıdi. Eger tsıfrlyq júıeler arqyly azamattyń tegi, aty, ákesiniń aty, týǵan kúni nemese týǵan jeri ózgergeni týraly aqparat tússe, oǵan mobıldi telefon nómiri nemese elektrondyq úkimet portalyndaǵy jeke kabıneti arqyly habarlama jiberiledi.
Azamat ótinish bildirgen jaǵdaıda qorǵanys isteri jónindegi basqarma tıisti jazbalardy bir saǵat ishinde engizedi. Ózgerister eltańbaly mórmen kýálandyrylady.
Al áskerı qyzmet ótkermegen, quqyq qorǵaý, arnaýly memlekettik organdarda nemese azamattyq qorǵaý organdarynda qyzmet etpegen, aqyly negizde áskerı-tehnıkalyq jáne basqa da mamandyqtar boıynsha oqymaǵan, sondaı-aq zapastaǵy ofıtserler men serjanttardy daıarlaý kýrsynan ótpegen azamattarǵa áskerı bıletter tek jumyldyrý, soǵys jaǵdaıy jáne soǵys ýaqytynda ǵana beriledi.
Áskerı mindettilerge áskerı bıletterdi nemese olardyń telnusqalaryn berý jónindegi memlekettik qyzmetti kórsetý tártibi de ózgerdi. Qujat alý úshin ótinish berý qajet. Qujattar kelip túsken kúni qabyldanyp, tirkeledi jáne jaýapty oryndaýshyǵa joldanady.
Oryndaýshy qujattar toptamasyn tekserip, memlekettik qyzmet kórsetý merzimi aıaqtalǵanǵa deıin eki jumys kúni qalǵanda nátıjeni basshynyń qol qoıýyna daıyndaıdy. Eger ótinishte nemese qujattarda qateler, dálsizdikter, belgilengen talaptarǵa sáıkessizdikter anyqtalsa ne qujattar toptamasy tolyq bolmasa, ótinish berýshige kemshilikterdi joıý qajettigi týraly habarlama jiberiledi. Mundaı jaǵdaıda memlekettik qyzmet kórsetý merzimi úsh jumys kúnine toqtatyla turady.
Eskertýler joıylǵannan keıin qujattardy qaıtadan habarlama alynǵan kúnnen bastap úsh jumys kúninen keshiktirmeı tapsyrý qajet. Memlekettik qyzmet kórsetý nátıjesinde ofıtserler, qatardaǵy jaýyngerler men serjanttarǵa áskerı bılet nemese onyń telnusqasy beriledi. Sondaı-aq dáleldi bas tartý usynylýy múmkin.
Ótinish portal arqyly berilgen jaǵdaıda qujatty alý orny týraly aqparat ótinish berýshiniń jeke kabınetine jiberilip, elektrondyq tsıfrlyq qoltańbamen rastalady. Qujattardy berý Memlekettik korporatsııa arqyly júzege asyrylady.
Áskerı mindettiler men áskerge shaqyrylýshylardy áskerı esepke qoıý tártibi de naqtylandy. Eger ótinishte nemese qujattarda qateler, belgilengen talaptarǵa sáıkessizdikter anyqtalsa ne qujattar toptamasy tolyq bolmasa, ótinish berýshige kemshilikterdi joıý qajettigi týraly habarlama jiberiledi. Bul rette memlekettik qyzmet kórsetý merzimi eki jumys kúnine toqtatyla turady. Qujattardy qaıtadan habarlama alynǵan kúnnen bastap eki jumys kúninen keshiktirmeı tapsyrý qajet.
Áskerı qyzmet ótkerý týraly málimetterdi ózektendirý jáne túzetý tártibine de ózgerister engizildi. Eger qorǵanys isteri jónindegi basqarmada azamattyń áskerı qyzmet ótkergeni týraly, onyń ishinde jeńildik kezeńindegi qyzmeti jóninde málimetter bolmasa, tıisti memlekettik organdarǵa, uıymdar men arhıvterge suraý salýlar joldanady. Qajet bolǵan jaǵdaıda basqa memleketterge de suraý jiberilýi múmkin.
Mundaı jaǵdaılarda memlekettik qyzmet kórsetý merzimi 90 jumys kúnine deıin uzartylady. Azamatqa merzimniń uzartylǵany týraly habarlanady. Eger qateler, dálsizdikter nemese qujattar toptamasynyń tolyq emestigi anyqtalsa, ótinish berýshige tıisti habarlama jiberilip, memlekettik qyzmet kórsetý merzimi úsh jumys kúnine toqtatyla turady. Qujattardy habarlama alynǵannan keıin úsh jumys kúni ishinde qaıta tapsyrý qajet.
Suraý salýǵa jaýap túskennen keıin qorǵanys isteri jónindegi basqarmalar málimetterdi Qorǵanys mınıstrliginiń Ortalyq júıesine engizedi. Áleýmettik qoldaý alýǵa úmitker azamattarǵa qosymsha anyqtama beriledi.
Budan bólek, túzetýler áskerge shaqyrylýshylar men áskerı mindettilerdi áskerı-tehnıkalyq jáne basqa da mamandyqtar boıynsha daıarlaý qaǵıdalaryna, Uly Otan soǵysy ardagerlerine kýálik berý tártibine, sondaı-aq áskerge shaqyrýdy keıinge qaldyrý jáne áskerı qyzmetten bosatý jónindegi memlekettik qyzmetterdi kórsetý qaǵıdalaryna engizildi.
Buıryq 2026 jylǵy 14 qarashadan bastap qoldanysqa engiziledi.
Aıta keteıik, buǵan deıin Áskerı qyzmetshiler ótinishti anonımdi joldaı alatynyn jazǵanbyz.
