Áskerı basshylar Qazaqstan Respýblıkasynyń áskerı doktrınasyn talqylady

Áskerı basshylar eki kúnge sozylǵan jıynda Qazaqstan Respýblıkasynyń áskerı doktrınasy tóńireginde oı bólisti.Onda doktrınanyń ózektiligi, ony júzege asyrý nátıjeleri men Qazaqstan Respýblıkasynyń Qarýly Kúshterin 2020 jylǵa deıin damytýdaǵy negizgi baǵyttar talqylandy.

- Qazaqstan áskeriniń qurylysyna jasalǵan taldaý 2007-2012 jyldarǵa arnalǵan Ulttyq qaýipsizdik strategııasy men Áskerı doktrına Prezıdent - Qarýly Kúshterdiń Joǵarǵy Bas qolbasshysy N.Á. Nazarbaevtyń talaptaryna sáıkes oryndalyp jatqanyn kórsetedi. Qorǵanys mınıstrligi utqyr, jaqsy daıarlanǵan jáne tehnıkalyq jaǵynan jabdyqtalǵan Qarýly Kúshterdi qurý boıynsha birqatar is-sharalardy júzege asyrýdy tolyqtaı oryndady, - dep atap ótti qorǵanys mınıstri Ádilbek Jaqsybekov óz sózinde.

Konferentsııa barysynda jetekshilik quram dúnıejúzindegi jáne aımaqtaǵy áskerı-saıası jaǵdaıdy, týyndaýy múmkin soǵystar men qarýly qaqtyǵystardyń sıpaty men mańyzyn taldady. Memlekettiń áskerı qaýipsizdigi men armııany damytýdyń negizgi baǵyttaryna qorytyndy jasaldy. Sondaı-aq, jańa ulttyq qaýipsizdik strategııasynyń (áskerı qaýipsizdiktiń), Áskerı doktrınanyń, Qazaqstan Respýblıkasy Qarýly Kúshterin damytý tujyrymdamasynyń uzaq merzimdi basymdyq jobalaryn ázirleýdiń ádistemelik negizi talqylandy.

- Keleshekte Áskerı doktrına talap etkendeı, Qarýly Kúshterdiń sapalyq parametrlerin jaqsartýǵa erekshe nazar aýdarylatyn bolady. Sebebi, jaqsy jabdyqtalǵan armııa ár ýaqytta qaýipsizdikti qamtamasyz etetin eń mańyzdy qural bolyp tabylady. Qarýly Kúshterimizdiń búgingi kelbeti qazirgi zamanǵa saı, urysqa jaramdy, elimizdiń egemendigi men aýmaqtyq tutastyǵynyń qaýipsizdigin qamtamasyz etýge qabiletti armııa qurylyp, ary qaraı damyp jatqanyn rastaıdy, - dedi óz sózin túıindegen Qorǵanys mınıstri Ádilbek Jaqsybekov.