«Áskerı baspana» jeńildetilgen ıpotekasy qaıta jandanady
ASTANA. KAZINFORM — Qorǵanys mınıstrliginde áskerı qyzmetshilerdi baspanamen qamtamasyz etý jáne «Áskerı baspana» jeńildetilgen ıpotekalyq nesıeleý baǵdarlamasyn qaıta jandandyrý máselesine arnalǵan jıyn ótti. Oǵan vedomstvo basshysy avıatsııa general-leıtenanty Dáýren Qosanov pen «Otbasy bank» basqarma tóraǵasy Lázzat Ibragımova qatysty. Bul týraly vedomstvonyń baspasóz qyzmeti málim etti.
Mınıstr jeke quramnyń áleýmettik ál-aýqaty Qorǵanys mınıstrligi jumysynyń basym baǵyttarynyń biri ekenin atap ótti.
Sondaı-aq, ol «Otbasy bank» mobıldi qosymshasynyń jumysyna qatysty máselelerdi jedel sheshkeni úshin Lázzat Ibragımovaǵa alǵysyn bildirip, onyń qyzmetin tezirek qalpyna keltirýge úmit artty.
Kezdesý barysynda mınıstr «Baspana.kz» saıtynda jarııalanǵan jańa talaptarǵa da nazar aýdardy. Olar áskerı qyzmetshiler úshin jaldamaly turǵyn úı rásimdeýde qosymsha qıyndyqtar týǵyzyp otyr.
Kezdesýdiń negizgi taqyryptarynyń biri «Áskerı baspana» baǵdarlamasyn qaıta iske qosý boldy. Dáýren Qosanov bastapqy jarna men nesıe boıynsha paıyzdyq mólsherlemeni tómendetý múmkindigin qarastyrýdy usyndy.
– Áskerı qyzmetshiler úshin jeńildetilgen ıpotekalyq nesıelerge naqty qoljetimdilik mańyzdy. Qazirgi ýaqytta ondaı múmkindik joq, al turǵyn úı baǵasynyń ósýinen bastapqy jarna jınaý is júzinde múmkin emes, – dep atap ótti Qorǵanys mınıstri.
Mınıstrdiń aıtýynsha, 15 myńnan astam áskerı qyzmetshi otbasy turǵyn úı tólemderi júıesi men ıpotekalyq baǵdarlamalar, sonyń ishinde «Áskerı baspana» arqyly turǵyn úı jaǵdaıyn jaqsartqan.
Sondaı-aq, ol burynǵydaı ekinshi deńgeıli naryqtan baspana satyp alý múmkindigin qaıtarýdy usyndy. Sebebi kóptegen áskerı qyzmetshiler jóndeýden ótken, ınfraqurylymy damyǵan, qyzmet ornyna jaqyn ornalasqan páterlerdi qalaıdy.
Kezdesý qorytyndysy boıynsha taraptar áskerı qyzmetshiler úshin ózekti turǵyn úı máselelerin birlese sheshýge daıyn ekendigin rastady.
Eske sala keteıik, Premer-mınıstr Memleket basshysynyń azamattar múddesi úshin ekonomıkalyq reformalar baǵdarlamasyn júzege asyrýdy retke keltirý jónindegi tapsyrmalaryn oryndaý máseleleri boıynsha keńes ótkizgende suranysqa ıe «Áskerı baspana» baǵdarlamasy qaıta iske qosylatynyn, ol jyl saıyn keminde jeti myń áskerı qyzmetshiniń otbasyna jańa úıden bólek, qaıtalama naryqtan da páter satyp alýǵa múmkindik beretinin aıtqan bolatyn.