Áskerı azyq-túlik paıynyń qunyn esepteý tásili ózgeredi
ASTANA. KAZINFORM — Úkimet armııanyń azyq- túlik paıyna qun taǵaıyndaýdyń tásilderin ózgertý joldaryn pysyqtap jatyr. Onyń ishinde óz-ózin qamtamasyz etý tetigi de zerttelip jatyr.
Bul týraly Premer-mınıstr Oljas Bektenovtiń Májilis depýtatynyń saýalyna joldaǵan jaýabynda aıtylǵan.
— Qorǵanys mınıstrliginiń janynan arnaıy qurylǵan jumys toby azyq-túlik paıynyń qunyn arttyrý jáne ony esepteý ádistemesin jetildirý máselelerin qarastyryp jatyr. Bul toptyń quramyna múddeli memlekettik organdar men uıymdardyń (Qarjy mınıstrligi, Іshki ister mınıstrligi, Tótenshe jaǵdaılar mınıstrligi, UQK, Memlekettik kúzet qyzmeti, «Atameken» UKP) ókilderi kiredi.
Jumys toby azyq-túlik paıynyń qunyn qaıta esepteý máselesimen 2023–2024 jyldardaǵy statıstıkalyq derekterdiń ózgerisin eskere otyryp aınalysyp jatyr. Sonymen qatar, paıdy esepteý tásilin qaıta qaraýdyń biryńǵaı tásilderi, onyń ishinde ózin-ózi qamtamasyz etýge kóshý múmkindigi de qarastyrylyp jatyr, — deıdi Oljas Bektenov.
Premer-mınıstr jalpy bul másele memlekettiń qarjylyq múmkindikterine qaraı jetildiriletinin eske salady.
— Buǵan qosa, jumys toby azyq-túlik paıynyń qunyn ınflıatsııa men baǵanyń ósýine qaraı turaqty túzetip otyratyn mehanızmdi ázirleý jáne tamaqtandyrýdy uıymdastyrýǵa qoǵamdyq uıymdardyń tarapynan baqylaý ornatý máselelerin de qarastyryp jatyr.
Jańa tásilderdi engizý eldegi ekonomıkalyq jaǵdaıdyń damýy men respýblıkalyq bıýdjettiń múmkindikteri eskerile otyryp júzege asyrylady, — dep jazylǵan jaýapta.
Buǵan deıin Oljas Bektenov Senat depýtatynyń saýalyna bergen jaýabynda Qorǵanys ónerkásip keshenin damytý qorynyń jarǵylyq kapıtalyn kóbeıtý týraly bıýdjettik ótinim ázirlengenin málim etken bolatyn.