Áskerı avarııalyq-qutqarý qyzmetin memleketke qaıtarý kerek - Senat

ASTANA. QazAqparat – Senat tóraǵasynyń orynbasary Asqar Shákirov bastaǵan depýtattar toby áskerılendirilgen avarııalyq-qutqarý qyzmetin memlekettik menshikke qaıtarýdy usyndy, dep habarlaıdy QazAqparat tilshisi.

Olar mundaı qadam qabyldaý qajettiliginiń sebepterin elimizdiń Premer-Mınıstri Álıhan Smaıylovtyń atyna joldaǵan depýtattyq saýalda jazǵan.

Senatorlar Qostanaı, Qaraǵandy, Shyǵys Qazaqstan jáne basqa da oblystardaǵy aýqymdy órtter qyzmetterdiń tómen tehnıkalyq jabdyqtalýynyń ótkir problemalaryn ashqanyn atap ótti. Órt sóndirýshiler tilsiz jaýǵa ótken ǵasyrdyń 60-70-shi jyldary shyǵarylǵan arnaıy tehnıkalarmen qarsy turdy.

Sonymen qatar, depýtattar eldegi qaýipti óndiristik nysandardaǵy apattardyń aldyn alý jáne olardy joıý jónindegi jalǵyz memlekettik qyzmet 2018 jyly jekemenshikke ótkenin, onyń balanstyq qunynan eki ese tómen somaǵa jekeshelendirilgenin eske saldy.

Olar atalǵan kásiporynǵa qatysty osyǵan deıin bes depýtattyq saýal joldanǵanyn aıta kele, osy kásiporyndy jekeshelendirgen memleket mamandandyrylǵan qyzmetten aırylǵanyn atap ótti.

Senatorlardyń aqparatyna qaraǵanda, Prezıdenttiń tapsyrmasy aıasynda Úkimette ekonomıkany monopolııasyzdandyrý, atap aıtqanda buryn negizsiz jekeshelendirilgen obektilerdi memlekettik menshikke berý jónindegi arnaıy komıssııa quryldy.

«Osyǵan baılanysty atalǵan komıssııanyń taıaýdaǵy otyrysynda 1932 jyly qurylǵan alǵashqy otandyq avarııalyq-qutqarý qyzmetteriniń quqyqtyq mırasqory bolyp sanalatyn, ıaǵnı jekeshelendirilgen «Kásibı áskerılendirilgen avarııalyq-qutqarý qyzmeti» memlekettik kásipornyn memleket menshigine qaıtarý týraly máseleni qaraýdy suraımyz», - dep atap ótti senator Sergeı Ershov.