«Áskerı áýlet» tuńǵysh respýblıkalyq baıqaýy bastaldy

ASTANA. QazAqparat - Búgin resmı túrde «Áskerı áýlet» alǵashqy respýblıkalyq baıqaýy bastaldy. Ol otbasylyq qundylyqtardy keńinen nasıhattaýǵa, januıa ınstıtýtyn nyǵaıtý men damytýǵa, óskeleń urpaqty patrıottyq jáne adamgershilikke tárbıeleý negizderi retinde qazaqstandyq áskerı qyzmetshilerdiń otbasyna demeý bolýǵa baǵyttalǵan.

Bul týraly QR QM baspasóz qyzmeti habarlady.

Atalǵan baıqaýǵa Qarýly Kúshterde qyzmet atqarǵan, sondaı-aq Uly Otan soǵysyna qatysqan ákeleriniń, analarynyń, atalary men apalarynyń dańqty áskerı dástúrlerin jalǵastyra otyryp, qazirgi ýaqytta qazaqstandyq armııada qyzmet etip júrgen áskerı qyzmetshiler qatysyp, otbasynyń erekshe qundylyqtaryn aıtyp bere alady.

«Áskerı áýlet» baıqaýy búkil elge urpaqtan urpaqqa áskerı qyzmet dástúrin jalǵastyryp kele jatqan aıbyndy áskerı qyzmetshilerdiń áýletin pash etedi. Qazaqstan Respýblıkasy Qorǵanys mınıstrliginiń ózindik baıqaýyna qatysýǵa nıet bildirýshilerge jaýyngerlik marapattar, otbasy músheleriniń eńbekteri men jetistikteri, dástúrleri men qasıetteri týraly áńgimeleı otyryp, óziniń áskerı áýletiniń portfolıosyn usynýlary qajet. Ótinimder aǵymdaǵy jylǵy tamyzdyń 5-25 aralyǵynda qabyldanady.