Áskerı-áýe kúshterinde komandırlik ushýlar uıymdastyryldy (FOTO)

ASTANA. QazAqparat - Búgin, Qazaqstan Áskerı-áýe kúshteriniń barlyq avıatsııalyq bazalarynda jańa 2016 oqý jyly jaýyngerlik daıarlyq josparyna sáıkes komandırlik ushýlardy uıymdastyrý men ótkizýden bastaldy, dep habarlaıdy Qorǵanys mınıstrliginiń baspasóz qyzmeti.

«Aýqymdy sharanyń maqsaty - pılotajdaý sheberliginde ushý daǵdysyn taǵy bir márte pysyqtaý jáne meńgerý bolyp tabylady. Ushý quramymen aldyn ala atalǵan jaǵdaılarda ushý daıarlyǵynyń túrleri boıynsha sabaqtar ótkizildi. Sonymen qatar basshylyq ushý quramynyń bilimi tekserilip, ázirligi baqylandy. Komandırlik ushýlar basshylyq ushý quramynyń taǵy bir ret óziniń ushý sheberligin, mashyǵyn ıgerip, jetildirý úshin mańyzdy qadamnyń biri bolyp tabylady», - dedi Áskerı-kólik avıatsııasynyń avıatsııalyq jasaq komandıri podpolkovnık Salamat Satybaldın.

Áskerı-áýe kúshteri úshin bul jaı dástúr ǵana emes, osy kezde avıatsııalyq bólimderdiń komandırleri jańa oqý jylyndaǵy ushýlardyń bastalýynyń irgetasyn qalaıdy. Alǵashqy komandırlik ushýlar kórnekilik maqsatta bolyp keledi.

Ushýlarǵa avıatsııalyq bazalardyń basshylyq quramy ÁÁK qolbasshysy basqarmasynyń ınspektor ushqyshtary qatysty.

«Osy kúni áskerı áýeılaqtarda jınaqtaǵan tájirıbesin jas mamandarǵa kórsete jáne bólise otyryp, tek qana joǵary bilikti mamandar jumys jasaıdy», - dep atap ótti Áskerı-áýe kúshteriniń qolbasshysy avıatsııa general-maıory Dáýren Qosanov.