«Áskerı ánder» radıofestıvaliniń jeńimpazdary Astanadaǵy Gala kontsertte óner kórsetedi
ASTANA. QazAqparat - 26 qarashada respýblıkalyq áskerı-patrıottyq ánder baıqaýy jeńimpazdarynyń esimderi jarııalanady. «Áskerı ánder» radıofestıvali - «Qazaqstan» RTRK AQ «Qazaq radıosy» men Qazaqstan Respýblıkasy Qorǵanys mınıstrliginiń birlesken jobasy.
Atalmysh joba Elbasy Nursultan Nazarbaevtyń Joldaýyndaǵy barsha qazaqstandyqtarǵa «Máńgilik El» patrıottyq aktisin ázirlep, qabyldap, uıymdastyrýǵa qatysty tapsyrmasy negizinde qolǵa alynyp otyr.
Radıofestıvalge barlyǵy 200-den astam án kelip tústi. Nátıjesinde 16 án gala-kontsertke joldama aldy. Baıqaý 26 qarashada Kongress-holl saraıynda úlken Gala-kontsertpen aıaqtalady.
Radıofestıvalǵa Qazaqstan aýmaǵyndaǵy áskerı bólimderdiń sarbazdary, kásibı ánshi men árbir Qazaqstan azamaty qatysty. Olar qazaq halqynyń áskerı-rýhty ánderin; qazaq kompozıtorlarynyń áskerı-patrıottyq ánderin áskerı oqıǵaǵa negizdelgen túrli oryndaýshylyq mánerde (dástúrli, akademııalyq, estradalyq) oryndady.
Kórkemdik keńestiń irikteýinen ótken ánder «Qazaq radıosy» men «Shalqar» ulttyq arnasy efırlerinen berilýde.
Radıofestıvalǵa qatysýǵa tilek bildirgen úmitkerler shyǵarmalaryn qazaq tilinde oryndaýy shart boldy. Gala-kontsertke joldama alǵan ónerpazdar ándi jandy daýysta oryndady. Tańdalyp alynǵan ánder «Qazaq radıosynyń» «Altyn qorynda» saqtalady. Іriktelgen ánder telearnalarda nemese kontsertterde oryndalady.
Radıofıestıvaldi ótkizýdiń maqsaty - qazaqtyń otansúıgish, rýhty, áskerı ánderin keń kólemde nasıhattaý, qazaq ánin sarbazdarǵa, qarapaıym jandarǵa oryndatý arqyly ulttyq mýzykalyq jáne ádebı tildi áskerıler men kópshilik arasynda dáripteý, áskerılerdiń ulttyq mádenıetke, ónerge degen qurmet senimin oıatý, Qazaq eliniń áskerı ánderiniń sapasy men sanyn kóbeıtý.
