Áskerge jumyldyrý jıyndary bastaldy - Qorǵanys mınıstrligi
ASTANA. 31 mamyr. QazAqparat - Qazaqstanda jumyldyrý jıyndary ótken jyldan bastap qaıta jandana bastady.
2010 jyly elimizdegi 9 oqý ortalyǵy men áskerı bólimderdiń bazasynda 1200 áskerı mindetti daıyndyqtan ótti. Olar úshin oqý ortalyqtary men áskerı bólimderdiń ınfraqurylymy ázirlenip, oqý-materıaldyq baza tolyqtaı jańartyldy. Qurlyq áskerleriniń oqý ortalyǵynda (Spassk k.) bazalyq ortalyq ashylyp, onda Qarýly Kúshter qatarynda qyzmet etpegen 400 adam áskerı mamandyq alyp shyqty.
QR Qorǵanys mınıstrliginiń baspasóz qyzmeti habarlap otyrǵandaı, keleshekte áskerı oqytylǵan rezervti daıarlaý júıesin odan ári jetildire túsý úshin 2011 jyly áskerde qyzmet etpegen 27-35 jas aralyǵyndaǵy azamattardy áskerı ómirge úıretý maqsatynda «Ońtústik» (Taraz), «Shyǵys» (Semeı), «Batys» (Aqtaý) óńirlik qolbasshylyqtarynda oqý ortalyqtary quryldy. Atalǵan oqý-jattyǵý ortalyqtarynda áskerı mindettilerdi qabyldaýǵa arnalǵan daıyndyq jumystary qyzý júrgizilip, búginde olar bolashaq Otan qorǵaýshylarǵa dáris berýge saqadaı-saı.
QR Úkimetiniń 2011 jylǵy 24 aqpandaǵy «Áskerı mindettilerdi áskerı jıynǵa shaqyrý týraly» qaýlysyn oryndaý barysynda aǵymdaǵy jyly áskerı jıynǵa tartylǵan áskerı mindettilerdiń jalpy sany 3600 adamǵa jetip otyr. Onyń 1 myńy 27 men 35 jas aralyǵyndaǵy áskerde bolmaǵan azamattar.
500 áskerı mindetti aǵymdaǵy jylǵy naýryz aıynan qyrkúıek aıyna deıingi aralyqta Spasskidegi oqý ortalyǵynda daıyndyqtan ótetetin bolady. 1 mamyrdan qyrkúıek aıyna deıingi aralyqta Tarazdaǵy oqý ortalyǵynda 200 áskerı mindetti, 1 tamyzdan qazan aıyna deıingi aralyqta Aqtaýdaǵy oqý ortalyǵynda 150 adam jáne 1 maýsymnan qyrkúıek aıyna deıingi aralyqta 150 adam Semeıdegi oqý ortalyǵynda ótetin jıyndarǵa qatysatyn bolady.
Bolashaqta ár jyl saıyn atalǵan tórt oqý ortalyǵynyń bazasynda eń kem degende áskerde bolmaǵan 1000 áskerı mindettini ázirleý josparlanyp otyr.
Sonymen qatar, toǵyz áskerı bólimde bólimsheler quramynda barlyǵy 2600 adamdy quraıtyn tirkelgen quramnyń jıynyn ótkizý josparda bar. Jalpy ústimizdegi jyly áskerı jıynǵa zapastaǵy 334 ofıtser men 3260 serjant pen sarbazdy tartý josparlanyp otyr.
Osydan biraz kún buryn Spasskidegi oqý-jattyǵý ortalyǵynyń bazasynda áskerı jıynnyń birinshi kezeńi aıaqtaldy. Ol jerde Almaty, Aqmola, Jambyl, Qostanaı, Pavlodar oblystarynyń jáne Astana men Almaty qalalarynyń Qorǵanys isteri jónindegi departamentterinen shaqyrylǵan zapastaǵy 100 ofıtser daıyndyqtan ótti.
Daıyndyq qorytyndysy boıynsha zapastaǵy ofıtserlerge 36352 áskerı bólimniń basshylyǵy tarapynan jaǵymdy sıpattama berildi. Sonyń negizinde olarǵa kezekti ofıtserlik ataqtar berý týraly josparly jumystar júrgizilýde.
Sáýirdiń jıyrmasynda atalmysh ortalyqtyń bazasynda áskerı jıynnyń ekinshi kezeńi bastaldy. Buǵan buryn Armııada qyzmet etpegen 100 áskerı mindetti azamat shaqyryldy.
Mamyr merekeleriniń qarsańynda «Spassk» Oqý ortalyǵynda bolǵan jumys saparynda el Prezıdenti osynda oqyp jatqandardy quttyqtady. Elbasy tarapynan Oqý ortalyǵyndaǵy áskerı jıynnyń uıymdastyrylýyna, oqý-materıaldyq bazasy men ınfraqurylymnyń jaǵdaıyna joǵary baǵa berdi.
Qazirgi kezde áskerı jıynnyń úshinshi kezeńine 1500-ge jýyq áskerı mindettini tartýǵa daıyndyq jumystary qyzý júrgizilýde. Onyń ishinde 150 adam Taraz jáne Spasskdegi oqý ortalyqtarynda daıyndyqtan ótedi. Sondaı-aq, 1300-den astam tirkelgen quramdaǵy áskerı mindetti bes bólimsheniń quramynda jıynǵa qatysatyn bolady.
Al, 2012 jyldan bastap áskerı jıynǵa shaqyrylýshylardyń sany men ótkiziletin oryndardyń geografııasyn kezeń-kezeń boıynsha keńeıtý josparda bar.
Áskerge jańa ádistemelermen daıyndalǵan rezervtegiler qajet. Áskerı oqytylǵan rezervti jasaqtaý elimizdi jan-jaqty daıyndalǵan mamandarmen sapaly qamtamasyz etý úshin qajet.
