Áskerge jaramdylyq týraly anyqtamany eGov-tan alýǵa bolady

ASTANA. KAZINFORM — «Smart voenkomat» jobasy aıasynda Qorǵanys mınıstrligi eGov elektrondyq úkimet portalynyń «Jeke kabınetinde» azamattarǵa arnalǵan jańa qyzmetti iske qosty. 

Bul qyzmet arqyly paıdalanýshylar azamattyń áskerı qyzmetke qatystylyǵy, áskerı esepte turýy, áskerı qyzmetten ótken kezeńderi, onyń ishinde áleýmettik tólemder alýǵa quqyq beretin merzimder týraly málimetterdi júktep alyp, messendjerler arqyly jiberip nemese basyp shyǵara alady.

Tájirıbe kórsetkendeı, ásirese áskerı qyzmetke jaramdylyq dárejesi týraly aqparatqa suranys joǵary. Atalǵan málimetterdi alý úshin eGov portalynyń «Jeke kabınetine» kirip, «Áskerı qyzmet» bólimindegi «Júkteý» batyrmasyn basý jetkilikti.

Áskerı esep máselelerine jaýapty Uıymdastyrý-jumyldyrý jumysy departamentiniń aıtýynsha, bolashaqta bul derekterdi mGov mobıldi qosymshasy men ekinshi deńgeıli bankterdiń servısteri arqyly da alý múmkin bolady.

Jańa qyzmet oqý ornyna qujat tapsyrý, áskerı qyzmetke nemese quqyq qorǵaý jáne arnaıy memlekettik organdarǵa jumysqa ornalasý kezinde qujat jınaý protsesin aıtarlyqtaı jeńildetedi. 

Aıta ketelik áskerge shaqyrylýshylardy medıtsınalyq tekserýdi jergilikti densaýlyq saqtaý organdary júrgizetini týraly jazǵan edik.