Áskerge SMS-habarlama arqyly shaqyrý qalaı uıymdastyrylady
ASTANA. KAZINFORM — Qarýly kúshteri Bas shtaby Uıymdastyrý-jumyldyrý jumysy departamenti bastyǵynyń orynbasary Farhat Aıdarbaev áskerge SMS-habarlama arqyly shaqyrý qalaı uıymdastyrlatynyn aıtty.
Onyń sózinshe, bolashaq sarbazǵa SMS-habarlama kelgennen keıin 3 kúnniń ishinde shaqyrý beketine barý kerek.
— Shaqyrý keminde kúntizbelik úsh kún buryn uıaly baılanystyń abonenttik nómirine jáne «elektrondyq úkimet» veb-portalyndaǵy paıdalanýshynyń kabınetine mátindik habarlama arqyly shaqyrý qaǵazyn jiberý jolymen júzege asyrylady.
Uıaly baılanystyń, onyń ishinde «elektrondyq úkimet» veb-portalynda tirkelgen abonenttik nómiri týraly málimetter bolmaǵan jaǵdaıda, qaǵaz jetkizgishtegi shaqyrý qaǵazy qolma-qol jetkiziledi ne turǵylyqty jeri tirkelgen mekenjaı, ýaqytsha turatyn (bolatyn) jeri nemese jumys orny boıynsha poshta arqyly jiberiledi. Jergilikti áskerı basqarý organdarynyń ýákiletti adamdary, uıym basshysy ne poshta operatorynyń kýreri shaqyrý qaǵazyn áskerı qyzmetke shaqyrylýǵa jatatyn azamatqa onyń qolyn qoıǵyza otyryp, jeke ózine tapsyrady, — dedi ol.
Qarýly kúshteri Bas shtabynyń ókili áskerı qyzmetke shaqyrylǵan azamat shaqyrý qaǵazyn qabyldaýdan bas tartqan kezde ony tabys etetin adam shaqyrý qaǵazyna tıisti belgi jasaıdy. Ol jergilikti áskerı basqarý organyna qaıtarylady. Shaqyrý qaǵazyn qabyldaýdan bas tartqan azamat tıisti túrde habarlanǵan bolyp esepteledi.
Sondaı-aq, ol áskerı qyzmetke shaqyrylǵan azamat shaqyrý qaǵazyn almaǵanyn aıtyp jaltara almaıtyn jaǵdaılardy jeke atady. Olar:
1) ózi jergilikti áskerı basqarý organyna bergen ne azamattyń atyna tirkelgen uıaly baılanystyń abonenttik nómiri boıynsha alsa, jetkizilgenin rastaıtyn esepti alǵan kezde;
2) «elektrondyq úkimet» veb-portalynda tirkelgen uıaly baılanystyń abonenttik nómirine qysqa mátindik habarlama jiberile otyryp, «elektrondyq úkimet» veb-portalyndaǵy paıdalanýshynyń kabınetinde;
3) turǵylyqty jeri tirkelgen mekenjaı, ýaqytsha turatyn (bolatyn) jeri nemese jumys orny boıynsha alsa, sondaı-aq shaqyrý qaǵazyn jergilikti áskerı basqarý organynda alǵan kezde tıisti túrde habardar etilgen bolyp esepteledi.
Buǵan deıin 28 tamyzda Qazaqstanda resmı túrde kúzgi áskerge shaqyrý naýqany bastalǵanyn jazǵan edik.