Áskerge shaqyrý boıynsha OQO kósh bastap tur

ShYMKENT. QazAqparat - Ońtústik Qazaqstan oblysynda 2018 jylǵy kóktemgi merzimde 2 myńǵa jýyq azamat áskerge attanady. Bul elimizdiń basqa óńirlerimen salystyrǵanda 2 nemese 3 esege deıin artyq. Bul týraly búgin Óńirlik kommýnıkatsııalar qyzmetinde ótken brıfıngte OQO Qorǵanys isteri jónindegi departamentiniń bastyǵy, polkovnık T.Áliqulov málimdedi, dep habarlaıdy QazAqparat.

Departament basshysy áskerge barýǵa umtylatyn jastardyń qatary artyp kele jatqanyn aıtady.

«Áskerge suranyp turǵan jastardyń qatary óte kóp, bizdi osy jaǵy qatty qýantady. Jalpy áskerge shaqyrtý alǵan azamattardy túrli saladaǵy áskerı bólimderge toptastyryp jiberip otyramyz. Máselen, qazirdiń ózinde Qazaqstan Respýblıkasy Ulttyq Qaýipsizdik Komıtetiniń Shekara qyzmetine 500-ge jýyq, Memlekettik Kúzet qyzmetine 26 azamat jóneltildi. Jalpy Qazaqstan Respýblıkasynyń Qarýly Kúshterine 700-ge jýyq, Ulttyq Ulanǵa 1000-ǵa tarta áskerge shaqyrylýshy jóneltiledi», - dedi Talǵat Shymkentbaıuly.

Aýdandyq, qalalyq medıtsınalyq komıssııalar dáriger-mamandarmen 100 paıyz jasaqtalǵan. Oblystyq qorǵanys isteri jónindegi departamentiniń medıtsınalyq baqylaý komıssııalary 144 dáriger-mamanmen qamtylǵan. Jalpy óńirde qalalyq, aýdandyq qorǵanys isteri jónindegi basqarma, bólimderinde 15 medıtsınalyq komıssııasy jumys isteıdi.

Aıta keteıik, oblystyq jınaqtaý beketi ǵımaratynda áskerge shaqyrylýshyrǵa arnalǵan 60 oryndyq 10 bólme, áskerı bólimderdiń ókilderin ornalastyrýǵa arnalǵan 10 oryndyq 2 bólme bar. Sondaı-aq, áskerge shaqyrylýshylarǵa arnalǵan úsh mezgil tamaqtaný, shash alý, jýyný bólmeleri uıymdastyrylǵan.