Áskerge shaqyrtylatyn on balanyń jeteýi medıtsınalyq tekserýden óte almaı jatyr - E. Qojaǵapanov
ASTANA. 21 qazan. QazAqparat - Elimizde áskerge shaqyrtylatyn on balanyń jeteýi medıtsınalyq tekserýden óte almaı jatyr.
Bul týraly búgin Májilistegi Úkimet saǵatynda QR Sport jáne dene shynyqtyrý isteri agenttiginiń tóraǵasy Erlan Qojaǵapanov málim etti.
Agenttik tóraǵasynyń aıtýynsha, jyl saıyn mektep oqýshylarynyń arasynda dene shynyqtyrý boıynsha normatıvterdi, Prezıdenttik testti tabysty tapsyratyndar kórsetkishi tómendep barady. Máselen, byltyrǵy jyly Prezıdenttik test tapsyrýǵa qatysqan 613 myń mektep oqýshylarynyń tek 3,6 paıyzy ǵana ony úzdik oryndaǵan. Al «jaqsy» baǵaǵa tapsyrǵandar on paıyzdan sál assa, qalǵany bul synaqty múldem tapsyra almaǵan. «Áskerı bólimderdegi medıtsınalyq tekserýlerge kelsek, munda da shaqyrtylǵan on balanyń jeteýi bizdiń áskerge qyzmet etýge jaramsyz dep tanylady. Qazirgi kúni agenttik normatıvterge ózgerister engizý jumystarymen de aınalysyp jatyr. Sonymen qatar, jeti myńnan astam jalpy bilim beretin mektepterdiń tek bes jarym myńy ǵana sporttyq zaldarmen qamtylǵan. Alaıda, olardyń materıaldyq tehnıkalyq jabdyqtalýy kóńil kónshitpeıdi. Tipti aýyldyq jerlerde qarapaıym sport quraldary da jetispeıdi», deıdi E. Qojaǵapanov.
Onyń aıtýynsha, keler jyldan bastap elimizdiń oqý oryndarynda dene shynyqtyrý men sporttan synyptan tys sabaqtar jelisin keńeıtý jónindegi sharalar keshenin ázirleý josparlanyp otyr.
