Áskerge shaqyrylýshylardy irikteý qalaı júrgizilip jatyr
ASTANA. KAZINFORM – Qorǵanys mınıstriniń tárbıe jáne ıdeologııalyq jumys jónindegi orynbasary, general-maıor Asqar Mustabekov Astanada áskerge shaqyrylýshylardy irikteý protsesin jáne olarǵa jasalǵan jaǵdaıdy tekserdi.
Áskerge shaqyrý naýqanynyń qyzǵan shaǵynda ótken tekseris barysynda elordalyq jınaý pýnktindegi jumys barysy qaraldy. Negizgi nazar tsıfrlyq sheshimderge aýdaryldy.
Atap aıtqanda, «Smart-voenkomat» jáne «e-Medosmotr» jobalary rásimderdi jedeldetýge, adam faktoryn azaıtýǵa jáne shaqyrý protsesiniń ashyqtyǵyn qamtamasyz etýge múmkindik beretini aıtyldy.
Qorǵanys isteri jónindegi departament, ákimdik jáne ardagerlik uıymdar ókilderiniń qatysýymen áskerdi jasaqtaý jáne qurylymdardyń ózara is-qımyly máseleleri talqylandy. Bul tásil árbir shaqyrylýshy úshin júıeli ári naqty uıymdastyrylǵan protsesti qamtamasyz etedi.
Tekserý barysynda shaqyrylýshylardyń ózderine de erekshe nazar aýdaryldy. Ashyq áńgime kezinde general-maıor olardyń kóńil-kúıi, turmys jaǵdaıy jáne qyzmetke daıyndyǵy týraly surady.
Sondaı-aq jastarǵa «Srochnık 2.0» baǵdarlamasynyń múmkindikteri tanystyrylyp, onyń áskerı qyzmetten keıin elimizdiń jetekshi joǵary oqý oryndaryna túsýge jol ashatyny túsindirildi.
– Toǵyzynshy synyptan keıin áskerı kolledjge túskim keldi, biraq múmkindik bolmady. Ýnıversıtetti bitirgen soń áskerge barýǵa naqty sheshim qabyldadym. Qazir medıtsınalyq tekserýden ótip, qujattarymdy jınap júrmin, – dedi áskerge shaqyrylýshy Altaır Sáken.
Tekserý barysynda ornalastyrý jaǵdaıy, tamaqtandyrýdyń uıymdastyrylýy jáne medıtsınalyq komıssııanyń jumysy da baǵalandy. Kabınetterdiń jabdyqtalýy men tekseristerdiń sapasyna erekshe nazar aýdaryldy.
– Astananyń jınaý pýnktindegi barlyq protsester qajetti deńgeıde uıymdastyrylǵan. Munda ashyqtyqty qamtamasyz etetin jáne shaqyrý naýqanynyń tıimdiligin arttyratyn zamanaýı tsıfrlyq sheshimder qoldanylyp jatyr. Shaqyrylýshylar úshin barlyq jaǵdaı jasalǵan, – dep qorytyndylady Asqar Mustabekov.
Sonymen qatar memlekettik organdar men qoǵam ókilderimen ótken kezdesýde general-maıor shaqyrylýshylarǵa moraldyq qoldaý kórsetýdiń mańyzyn atap ótti.
Onyń aıtýynsha, ardagerlerdiń qatysýy jáne kúshtik qurylymdarmen ózara is-qımyl jastardyń áskerı qyzmettiń alǵashqy kezeńine senimdi beıimdelýine jáne onyń mańyzyn túsinýine yqpal etedi.
Aıta keteıik, bul maýsymda Shymkentten 1200-den astam azamat áskerge shaqyrylady.
