Áskerge shaqyrylýshylardy medıtsınalyq tekserýdi jergilikti densaýlyq saqtaý organdary júrgizedi

ASTANA. KAZINFORM — Jergilikti densaýlyq saqtaý organdarynyń mamandarynan quralǵan dárigerlik komıssııalar áskerge shaqyrylatyn azamattardy medıtsınalyq tekserýden ótkizip, olardyń áskerı qyzmetke jaramdylyǵyn anyqtaıdy.

Qorǵanys mınıstrliginiń málimetinshe azamattardy áskerge shaqyrýdy uıymdastyrý jáne qamtamasyz etý óz quzyreti sheginde jergilikti atqarýshy organdarǵa júktelgen.

Áskerge shaqyrý komıssııasynyń tóraǵasy — oblys ákiminiń orynbasary.

— Shaqyrylatyn azamattardyń tizimin jasaý, shaqyrtýlardy jiberý jáne shaqyrylym is-sharalaryn uıymdastyrý jergilikti áskerı basqarý organdarynyń mindetine jatady. Áskerge shaqyrylǵan azamattar komıssııasynyń shaqyrýymen jıyn pýnktine kelýge mindetti.

Eger shaqyrtýdy jeke tapsyrý múmkin bolmasa, azamattardy jetkizý mindeti ishki ister organdaryna júkteledi. Olar áskerge shaqyrýdan jaltarǵan adamdardy izdep, jetkizýmen aınalysady, — delingen mınıstrlik habarlamasynda.

Jergilikti atqarýshy organdar polıtsııamen birlesip áskerge shaqyrý erejesin buzǵan azamattardy anyqtaý boıynsha reıdtik is-sharalar júrgizedi.

Shaqyrylǵan azamattar jıyn pýnktinde óziniń áskerge jaramdylyq mártebesi boıynsha tekserýden ótedi.

— Medıtsınalyq tekserý densaýlyq saqtaý organdarynyń mamandary arqyly júrgizilip, sarbazdardyń densaýlyǵy baǵalanady, jaramdylyq kategorııasy anyqtalady jáne olardyń merzimdi áskerı qyzmetke jaramdylyǵy týraly sheshim qabyldanady.

Zańdy negizder bolsa, azamattarǵa áskerden keıinge qaldyrý nemese bosatý beriledi. Basqa jaǵdaılarda olar Qarýly Kúshterge, basqa áskerlerge jáne áskerı quralymdarǵa merzimdi áskerı qyzmetke jiberiledi, — delingen habarlamada.

Aıta keteıik, 18-den 27 jasqa deıingi, áskerden keıinge qaldyrý nemese bosatý quqyǵy joq azamattardy áskerge shaqyrý jylyna eki ret — naýryzdan maýsymǵa jáne qyrkúıekten jeltoqsanǵa deıin júrgiziledi. 

Aıta ketelik áskerge shaqyrý tolyq avtomattandyrylady: «Smart voenkomat» múmkindikteri tanystyrylǵan edi.