Áskerge saý attanyp, baldaqpen oraldy: Túrkistandyq sarbazdyń anasy ulynyń densaýlyǵyna alańdaýly
TÚRKІSTAN. KAZINFORM – Túrkistan oblysy Keles aýdanynyń 19 jastaǵy turǵyny Baqytjan Ámıt áskerge attanyp, tórt aıdan astam ýaqyttan keıin densaýlyǵyna baılanysty úıine oralǵan. Qazir ol baldaqpen júr. Oǵan ota jasaý qajet.
Baqytjan 2025 jylǵy qarashada Saryaǵashtaǵy medıtsına kolledjinde oqyp júrip, Qonaev qalasyndaǵy (burynǵy Qapshaǵaı) № 58012 áskerı bólimge jiberilgen. Anasynyń aıtýynsha, onyń týǵannan beri jambas býynynda aqaýy bolǵan. Alaıda áskerı medıtsınalyq komıssııa ony qyzmetke jaramdy dep tanyǵan.
— Áskerge barǵannan keıin eki aı ótken soń aıaǵym qatty aýyra bastady. Aqsap júretin boldym. Birneshe ret aıttym, biraq emdelýge jibermedi. Sarbaz bolǵan soń shydap júre berdim, — dedi Baqytjan Ámıt.
Sarbaz Qonaev qalasynda 4 aıdan astam qyzmet etip, keıin Semeıdegi № 54770 áskerı bólimge aýystyrylǵan. Anasynyń aıtýynsha, Semeıdegi dárigerler onyń jaǵdaıyn tekserip, Astanadaǵy áskerı gospıtalǵa jibergen.
— Astanadaǵy gospıtalda 70 kúnnen astam jatty. Dárigerlerden balamdy muqııat tekserýdi suradym. «Súıek jemirilýi» dedi. Odan soń Semeıge qaıtardy. Áskerı-dárigerlik komıssııa balamdy áskerı qyzmetke jaramsyz dep tanyp, Túrkistanǵa jiberdi. Sap-saý kúıinde áskerge alyp ketip, aýyryp qalǵannan keıin «óziń baryp emdel» degendeı úıge ákelip tastady. Balam qazir aqsandap, baldaqpen júr, — dedi sarbazdyń anasy Sáýle Qýandyqova.
Qazir Baqytjannyń anasy ulynyń emdelýine alańdap otyr. Onyń aıtýynsha, dárigerler ota jasaý qajettigin aıtqan. Sonymen qatar medıtsınalyq saqtandyrý máselesine baılanysty em alýda qıyndyqtar bar.
— Aýdandyq emhanada travmatologqa qaraldyq. Dáriger baldaqty tastamaý kerektigin eskertti. Semeıdegi dárigerlerdiń qorytyndylaryn Tashkenttegi jeke klınıkaǵa jiberdim. Olar shuǵyl túrde ota jasaý qajet ekenin aıtty. Bul úshin qomaqty qarajat kerek. Oǵan shamam jetpeıdi, dári-dármegin de ala almaı otyrmyn. Ózim alty balanyń anasymyn. Balamnyń densaýlyǵyn qalpyna keltirip, qajetti emin alýǵa kómektesse eken deımin, — dedi anasy.
Jaǵdaıǵa qatysty Qorǵanys mınıstrligi resmı túsinik berdi.
— 2025 jylǵy qarashada merzimdi áskerı qyzmetke shaqyrý kezinde medıtsınalyq kýálandyrýdan ótken B.N. Ámıt densaýlyǵyna shaǵym aıtpaǵan. Jergilikti atqarýshy organ qurǵan medıtsınalyq komıssııanyń qorytyndysymen ol áskerı qyzmetke jaramdy dep tanylǵan, — dep habarlady mınıstrlik.
Áskerı qyzmet barysynda densaýlyǵyna qatysty shaǵymdary paıda bolǵannan keıin sarbaz der kezinde tekserýge jiberilip, gospıtalǵa jatqyzylǵan jáne qajetti em qabyldaǵan. Tekserý barysynda býyndardyń týa bitken patologııasymen qatar, nesep shyǵarý júıesiniń qosymsha aýrýlary anyqtalǵan.
— Anyqtalǵan aýrýlardyń jıyntyǵy boıynsha ol áskerı-dárigerlik komıssııaǵa usynylyp, áskerı qyzmetke jaramsyz dep tanyldy. Keıinnen belgilengen tártippen densaýlyq jaǵdaıyna baılanysty áskerı qyzmetten bosatyldy, — delingen jaýapta.
Buǵan deıin aqtaýlyq sarbazdan áskerı bólimdegi uryp-soǵýǵa qatysty shaǵym túskeni habarlanǵan bolatyn. Osyǵan baılanysty sotqa deıingi tergeý bastalǵan.
