Áskerge irikteý protsesi avtomattandyrylady
ASTANA.KAZINFORM — Qazaqstan Qarýly kúshterinde azamattardy áskerge shaqyrý úderisine jasandy ıntellekt (JI) engizilip jatyr. Bul týraly Qorǵanys mınıstrligi Aqparattyq tehnologııalar departamentiniń bastyǵy Bekjan Myrzaǵalıev Jibek Joly telearnasynyń «Búgin LIVE» baǵdarlamasynda málimdedi.
— Bul júıe tek jasandy ıntellektini engizýmen shektelmeıdi. Ol azamattardyń áskerı esepke alynýynan bastap áskerge shaqyrýǵa deıingi barlyq protsesti avtomattandyrýdy kózdeıdi. Qazirgi ýaqytta JI testileý kezeńinde tur. Pılottyq joba Abaı oblysynda iske qosylady dep josparlanyp otyr. Biz qazirgi tańda azamattardy irikteýge qajetti málimetterdi zerttep jatyrmyz. Іrikteý barysynda birinshi kezekte bilim deńgeıi, mamandyǵy, sporttyq qabileti men razrıadtary sekildi derekter eskeriledi. Mundaı aqparattardyń negizinde áskerge shaqyrylatyn azamattardy JI arqyly irikteý júrgiziledi. Bul joba sarbazdardy Qarýly Kúshterdiń túrli salalary boıynsha tıimdi bólýge sep bolady, — dedi vedomstvo ókili.
Sonymen qatar Bekjan Myrzaǵalıevtiń aıtýynsha, qazirgi tańda Qorǵanys mınıstrligi 25-ten astam memlekettik organmen biriktirilgen. Bul ıntegratsııalar arqyly azamattardyń densaýlyǵy, medıtsınalyq esepte turýy sııaqty mańyzdy málimetter aldyn ala saraptalyp, irikteledi.
Baǵdarlama barysynda azamattardyń psıhıkalyq densaýlyǵy, atap aıtqanda depressııaǵa beıimdiligi qalaı anyqtalatyny týraly suraqqa da jaýap berildi.
— Qazirgi ýaqytta bul másele arnaıy testileý arqyly anyqtalady. Bul baǵytta jasandy ıntellekt qoldanylmaıdy, — dep naqtylady departament basshysy.
Sondaı-aq, azamattardyń jeke derekteriniń qaýipsizdigi týraly da sóz boldy.
— Qorǵanys mınıstrligi — memlekettik organ. Sondyqtan derekterdiń qaýipsizdigine jaýap beretin arnaıy bólimsheler jumys isteıdi. Derekter qatań túrde qorǵalady jáne syrtqa taralmaıdy, — dedi Bekjan Myrzaǵalıev.
Buǵan deıin, Qorǵanys mınıstrliginiń qaramaǵyna kiretin tehnıkalyq jáne kásiptik bilim berý baǵdarlamalary iske asyrylatyn bes kolledjge qujat qabyldap jatqanyn jazǵanbyz.