Áskerge óz erkimen kelip jatqan jastardyń qarasy qalyń — Qorǵanys mınıstrligi

ASTANA. KAZINFORM — Qorǵanys mınıstriniń orynbasary Qanysh Ábýbákirov áskerden jaltarǵandarǵa qatysty pikir aıtty.

— Bıyl áskerge shaqyrýǵa joldanatyn SMS-ti zańdastyrdyq. Áskerge shaqyrtýǵa jatatyn árbir adamǵa SMS kelse, ol jergilikti qorǵanys departamentine barýy tıis. Qaıta-qaıta shaqyrtýǵa kelmegen adamdar tizimin ishki ister organdaryna tapsyramyz. Bul rette, olar jedel profılaktıkalyq sharalar qabyldaıdy. Bir shaqyrý naýqanynda 20 myńnan astam sarbazdy qamtımyz. Sol kezde osyndaı (áskerge shaqyrtýdan jaltarý) 5-10 jaǵdaıy tirkeledi, ıaǵnı olar úsh-tórt shaqyrtýǵa kelmegender. Negizinen, el jastary Otan aldyndaǵy boryshyn atqaryp jatyr. Sondyqtan olarǵa nesıe boıynsha «kanıkýl», oqý oryndaryna grant berilip jatyr, — dedi Q. Ábýbákirov Parlament Májilisinde tilshiler suraǵyna jaýap bere otyryp.

Onyń aıtýynsha, qazir áskerdegi qylmys ta, ólim-jitim de azaıdy.

— Qazir jastar áskerge óz erkimen kelip jatyr jáne olarǵa alǵysymdy aıtqym keledi. Olar álemdegi geosaıası jaǵdaıdy túsinip, ásker qataryna ózderi baryp jatyr, — dedi mınıstrdiń orynbasary.

Eske salsaq, Qarýly kúshteri Bas shtaby Uıymdastyrý-jumyldyrý jumysy departamenti bastyǵynyń orynbasary Farhat Aıdarbaev áskerge SMS-habarlama arqyly shaqyrý qalaı uıymdastyrlatynyn túsindirdi. 

Bolashaq sarbazǵa SMS-habarlama kelgennen keıin 3 kúnniń ishinde shaqyrý beketine barý kerek.
28 tamyzda Qazaqstanda resmı túrde kúzgi áskerge shaqyrý naýqany bastaldy. Ol 31 jeltoqsanǵa deıin jalǵasady. 

Áskerden jaltarǵandar 1 jylǵa sottalýy múmkin.