Áskerge kúzgi shaqyrylymnyń jóneltýi jaqynda bastalady - Qorǵanys mınıstrligi
ASTANA. QazAqparat - 19 qazannan bastap, áskerge shaqyrý, «Kúz-2015-tiń» alǵashqy jóneltýi bastalady. Aldyn ala shaqyrylǵandar 19 qazannan bastap, Qazaqstan Qarýly Kúshteriniń áskerı bólimderine jóneltiledi, dep habarlady QR Qorǵanys mınıstrliginiń baspasóz qyzmetinen.
Qazir Qarýly Kúshteri, UQK Shekara qyzmeti jáne Qazaqstan Respýblıkasy Memlekettik kúzet qyzmetiniń bólimderi úshin áskerı komandalardy aldyn ala qalyptastyrý boıynsha jumys júrgizilýde.
Áskerı bólimderdi jasaqtaý eks-aýmaqtyq jáne aýmaqtyq qaǵıdattar boıynsha júzege asyrylady. Bólý kezinde shaqyrylýǵa deıingi bolashaq sarbazdardyń alǵan mamandyqtary, dene jáne moraldyq-psıhologııalyq daıyndyǵy eskeriledi.
1 qazanda elimizde kúzgi shaqyrý kampanııasy bastalǵanyn esterińizge sala keteıik. Aýdandyq jáne oblystyq komıssııa shaqyrylýshylardy medıtsınalyq kýálandyrýdy, jeke isterdi zerdeleýdi júzege asyrady, ata-analarymen túsindirme jumys júrgizedi.
Osy kúzde merzimdi áskerı qyzmetke keıinge qaldyrylýǵa nemese shaqyrylýdan bosatylýǵa quqyǵy joq 18 ben 27 jas aralyǵyndaǵy 12 myńnan asa qazaqstandyqty joldaý josparlanýda. Olardyń 4000-ǵa jýyǵy Qarýly Kúshterdiń bólimderinde qyzmet etetin bolady.
