Áskerge kósheden eriksiz jeke kólikpen alyp ketý zańsyz — Qorǵanys mınıstrligi

ASTANA. KAZINFORM — Qorǵanys mınıstriniń orynbasary Shaıh-Hasan Jazyqbaev áskerı mindetin óteýden jaltaryp júrgen jastardy eriksiz kólikke tıep alyp ketýge qatysty túsinik berdi.

— Áskerge shaqyrý algorıtmi bar, ol jergilikti áskerı basqarý, atqarýshy organdar jáne polıtsııa qyzmetiniń qaýlysymen bekitilgen. Sizder jelide taraǵan vıdeolardan bir bóligin ǵana kóretin shyǵarsyzdar, al negizinde qyzmettik kýáligin kórsetip, kónbegen jaǵdaıda ǵana qoldanylatyn shara. Іshki ister mınıstrliginiń ókili kólikpen alyp ketýge mindetti. Bul jerde Qorǵanys mınıstrliginiń qyzmetkerleri polıtseılerge kómekshi, — dedi Shaıh-Hasan Jazyqbaev Májilis qabyrǵasynda BAQ ókilderiniń saýalyna jaýap bere turyp.

Sondaı-aq BAQ ókilderi mınıstrdiń orynbasarynan áskerge shaqyrylǵandardy kósheden jeke kólikpen alyp ketýdiń zańdylyǵyn surady. 

— Bolǵan eki jaǵdaı boıynsha qyzmettik tekserý ótti, zań boıynsha shara qabyldandy. Beınerolıktegi jeke kólik múmkin Qorǵanys mınıstrligine tıesili shyǵar. Qorǵanys mınıstrligi men Іshki ister mınıstrligine tıesili kóliktermen tasymaldaıdy, jeke kólikpen tasymaldasa zańsyz, — dep tolyqtyrdy Sh. Jazyqbaev.

Sondaı-aq, brıfıng barysynda Qorǵanys mınıstriniń orynbasarynan Qazaqstan áskeri qashan tolyq qazaqshalanatyny suraldy. 

Eske sala ketsek, byltyr Qorǵanys mınıstrligi polıtsııanyń áskerge shaqyrylǵandardy májbúrlep jetkizýge quqyly ekenin habarlaǵan edi.

Odan bólek, mınıstrlik áskerge kósheden eriksiz alyp ketse, sotqa berýge bola ma degen saýalǵa jaýap berdi.