Áskerge kósheden eriksiz alyp ketse, sotqa berýge bola ma – mınıstrlik jaýaby

ASTANA. KAZINFORM – Qorǵanys mınıstriniń birinshi orynbasary – Qazaqstan Respýblıkasy Qarýly Kúshteri Bas shtabynyń bastyǵy Sultan Qameletdınov jastardyń Otan aldyndaǵy boryshyn óteýge qatysty pikirin bildirdi. 

«Biz quqyqtyq memleket qurý týraly aıtyp otyrmyz, zań bar jáne barlyq azamat ony oryndaýǵa mindetti. Naqty aıtqanda, Konstıtýtsııanyń 36-babyna sáıkes,  Otan aldyndaǵy mindetti óteý – paryz. Aıtalyq, azamat salyq tólemese jaýapqa tartylady, sondyqtan áskerı mindetti óteý máselesine kelgende qos standart bolmaýy kerek. Zań qatal, biraq ony oryndaý qajet», - dedi Sultan Qameletdınov Májilistiń jalpy otyrysy barysynda. 

Sondaı-aq BAQ ókilderi mınıstrdiń birinshi orynbasaryna jastardy áskerge kósheden eriksiz alyp ketýge qatysty saýal qoıdy. 

«Sizdiń ne aıtyp turǵanyńyzdy bilmeımin. Bizde bir qujat bar – áskerge shaqyrý qaǵazy. Sizde naqty fakti bar ma? Soǵan júgineıik. Biz quqyqtyq memleket quryp jatyrmyz, eger ol ony zańsyz dep sanasa, sotqa júginsin», - dep túsindirdi mınıstrdiń orynbasary. 

Taıaýda ǵana Qorǵanys mınıstrliginiń ókili jastardy áskerge kósheden nemese jumys ornynan alyp ketýge qatysty túsinik bergen edi. Olardyń aıtýynsha, áskerge kósheden alyp ketý týraly kóbinese BAQ jáne áleýmettik jelilerde taraıdy.