Áskerge ketken sarbazdyń nesıesine paıyz qosyla ma
ASTANA. KAZINFORM — Qarjy naryǵyn retteý jáne damytý agenttigi merzimdi áskerı qyzmetke shaqyrylǵan azamattarǵa banktik qaryzdar men mıkrokredıtter boıynsha tólemdi keıinge qaldyrý tártibi týraly eske salady.
Tólemdi keıinge qaldyrý merzimdi qyzmettiń barlyq kezeńine jáne ol aıaqtalǵannan keıin taǵy kúntizbelik 60 kúnge avtomatty túrde beriledi.
Tólemdi keıinge qaldyrý kezeńinde negizgi borysh pen syıaqy boıynsha tólemder toqtatyla turady. Bul rette keıinge qaldyrý kezeńi úshin syıaqy eseptelmeıdi.
Bankke nemese mıkroqarjy uıymyna (MQU) jeke júginý, ótinish berý, áskerı komıssarıattan anyqtama berý ne kredıttik shartqa qosymsha kelisimge qol qoıý talap etilmeıdi.
Merzimdi qyzmetke shaqyrý jáne odan bosatý týraly málimetter Qorǵanys mınıstrliginiń, kredıttik bıýrolardyń jáne qarjy uıymdarynyń aqparattyq ózara is-qımyly sheńberinde kredıtorlarǵa beriledi.
Tólemdi keshiktirý áskerge shaqyrǵanǵa deıin bolsa, ne isteý kerek?
Óndirip alý rásimderi bastalǵan bereshekke qatysty zańnamada belgilengen jaǵdaılarda merzimdi qyzmetti ótkerý kezeńine tıisti rásimderdi toqtata turý da kózdelgen.
Áskerı qyzmet aıaqtalǵannan keıin bereshek saqtalady. Sondyqtan áskerge shaqyrylǵanǵa deıin kredıttik mindettemelerińizdiń jaı-kúıin tekserip, qajet bolǵan jaǵdaıda olardy retteý boıynsha sharalar qabyldaý usynylady.
Merzimdi qyzmet kezinde jańa kredıtter berilmeıdi
2025 jylǵy 31 tamyzdan bastap merzimdi qyzmettiń áskerı qyzmetshilerine jańa banktik qaryzdar men mıkrokredıtter berýge tyıym salynady. Ótinimdi qaraý kezinde bank nemese MQU kredıttik bıýro arqyly azamattyń mártebesin tekseredi. Kredıttik esepte merzimdi qyzmetti ótkerý týraly aqparat bolǵan kezde kredıtor jańa qaryz nemese mıkrokredıt bermeıdi.
Tólemdi avtomatty túrde keıinge qaldyrý tetigi 2024 jylǵy tamyz aıynan bastap qoldanylatynyn eske salamyz. «Memlekettik kredıttik bıýro» AQ-tyń derekteri boıynsha 2024 jylǵy tamyzdan bastap 2026 jylǵy 1 maýsymǵa deıin jalpy somasy 23,5 mlrd teńgege qaryzdar boıynsha merzimdi qyzmettiń 82,1 myń áskerı qyzmetshisiniń tólemderi keıinge qaldyryldy.
2026 jylǵy birinshi jartyjyldyqtda 30 myń áskerı qyzmetshiniń jalpy somasy 7,5 mlrd teńgege qaryzdary boıynsha tólemderi keıinge qaldyryldy.
Áskerge shaqyrar aldynda áskerı qyzmetshilerge barlyq kredıttik mindettemeler týraly aqparattyń bar-joǵyn jáne ózektiligin tekserý úshin kredıttik esebin tekserý usynylady.
Aıta keteıik, tólemdi keıinge qaldyrý bereshekti esepten shyǵarýdy bildirmeıdi. Belgilengen kezeń aıaqtalǵannan keıin kredıt boıynsha mindettemeler saqtalady jáne qaryz alýshy olardy oryndaýdy jalǵastyrýy kerek.
Budan buryn Prezıdent áskerdiń jaýyngerlik ázirligi men qorǵanys bıýdjetine qatysty tapsyrma bergenin jazǵanbyz.
