Áskerge barýdan jaltaryp júrgender 30 myńnan asyp otyr

ASTANA. QazAqparat – QR Qarýly kúshteri bas shtaby uıymdastyrý-jumyldyrý jumystary departamentiniń baǵyt aǵa ofıtseri Rýslan Tapashev merzimdi áskerı qyzmetke shaqyrtý úshin izdestirilip jatqan adamdar jaıynda aıtty, dep habarlaıdy QazAqparat tilshisi.

Búgin Ortalyq kommýnıkatsııalar qyzmetindegi baspasóz máslıhatynda tilshiler áskerı boryshyn óteýden jaltaryp júrgen jastar týraly suraq qoıdy.

«Bul turǵyda qashyp júrgen emes, izdestirilip júrgen dep naqtylaǵanym durys bolar. Osy jyly izdestirýde júrgen azamattardyń sany 30 myńnan asyp jyǵylady. Al byltyr 37 myńnan astam boldy», - dedi R. Tapashev.

Osy oraıda ol jastardy áskerge shaqyrý pýnkterine jetkizý boıynsha tıisti jumys júrgiziletinin aıtty.

«Olardy izdestirýge túrli sebepter áser etip otyr. Olar jumys babymen turǵylyqty jerinen kóship ketkenimen áskerı esepten shyqpaıdy. Sondyqtan olardy izdestirýge týra keledi. Atap aıtqanda, olar áskerge shaqyrý pýnkterine shaqyrý qaǵazy boıynsha kelmeıdi. Osy oraıda bul adamdardyń tizimi jasalyp, izdeý júrgiziledi. Olar - 18-27 jas aralyǵyndaǵy áskerge shaqyrýǵa jatatyn jastar», - dedi bas shtabtyń uıymdastyrý-jumyldyrý jumystary departamentiniń aǵa ofıtseri.