Áskerge barýdan jaltarǵan 200 bozbala Reseıge qashyp ketken

ASTANA. QazAqparat – QR Bas áskerı prokýrorynyń birinshi orynbasary Maqsat Qazıev áskerden jaltaryp, Reseıge ketip qalǵan jastarǵa qatysty pikir bildirdi, dep habarlaıdy QazAqparat tilshisi.

Búgin Senatta áskerı qyzmetshilerdiń densaýlyǵyn talqylaý kezinde depýtat Sergeı Ershov áskerden jaltarǵandar týraly surady.

«Buqaralyq aqparat quraldarynda áskerge barmaý úshin Soltústik Qazaqstannan Reseıge qashyp barǵandar týraly málimet tarady. Máselen, qazirgi kezde kórshi memlekettiń aýmaǵynda kóktemgi áskerge shaqyrylatyn 250-ge jýyq azamat bar. Shynymen de jaǵdaı osylaı ma? Bul jigitterdiń taǵdyry ne bolady?» dep surady senator.

Óz kezeginde Bas áskerı prokýrordyń birinshi orynbasary Maqsat Qazıev osyndaı derekter bar ekenin naqtylady.

«Rasynda da mundaı aqparat BAQ-ta jarııalanǵan. Prokýratýra organdary Qorǵanys mınıstrligine tıisti nusqaý berdi. 200 adamnyń 120-sy Reseı Federatsııasynda bilim alyp jatyr, ıaǵnı stýdent sanatyna jatady», - dedi S. Qazıev.

Osy oraıda ol Qorǵanys mınıstrligi bul baǵytta tıisti is-qımyldy pysyqtap jatqanyn aıtty.

«Eger olar shynymen kórshi elde oqýda júrgeni naqtylansa, onda bul jaǵdaı áskerge barý merzimin keıinge shegerýge sebep bolady. Sondaı-aq, bul jigitterdiń arasynda oqýǵa túspegenderi anyqtalsa, Qazaqstan aýmaǵyna kelgen kezde olar mindetinen jaltarǵany úshin aıyptalady», - dedi Bas áskerı prokýrordyń birinshi orynbasary.