Áskerge barmaı-aq 40 kúndik daıarlyqtan qalaı ótýge bolady

ASTANA. QazAqparat - Búgin Astanada ótken baspasóz máslıhatynda qalalyq Qorǵanys isteri jónindegi departamenti bastyǵynyń orynbasary, tárbıe jáne ıdeologııalyq jumystar bóliminiń bastyǵy Ǵanı Artyqov 40 kúndik áskerı daıarlyq mektebinen ótýdiń sharttaryn túsindirdi, dep habarlaıdy «QazAqparat» HAA tilshisi.

«Áskerı qyzmetke balamaly qyzmet jaıly aıtarym, aqyly túrde áskerı daıyndyqtan - jasy 24-ten asqan, densaýlyǵy jaramdy, áskerı mindetin atqarýdy keıinge shegerý quqyǵyna ıe jigitter ǵana óte alady. Qarýly Kúshterimiz san boıynsha asa aýqymdy emes bolǵandyqtan, sondaı-aq barlyq shaqyrylýshy kontıngentti áskerı daıyndyqpen 100 paıyz qamtý múmkin bolmaǵandyqtan, áskerı daıyndyqtyń balamaly túri usynyldy. Aqyly túrdegi áskerı daıyndyq mektepterinde oqý úshin azamat ótinimdi Halyqqa qyzmet kórsetý ortalyqtaryna berip, odan keıin medıtsınalyq komıssııadan ótedi», - dedi Ǵanı Artyqov.

Onyń aıtýynsha, mundaı irikteý jyl saıyn 16 departamenttiń barlyǵynda ótkizilip turady.

«Azamattardyń ótinimi boıynsha biz olardyń barlyǵyn áskerı daıyndyq mektebinen ótkizemiz. Eń bastysy - densaýlyǵy jaramdy bolýy kerek. Aqyly áskerı daıyndyq mektebinen ótý baǵasy 263 myń 158 teńge», - dedi ol.


foto:mod.gov.kz