Áskerdiń aldyńǵy qalqany – Tankısterdiń jaýyngerlik mindeti qandaı

ASTANA.KAZINFORM – Eki kún buryn Memleket basshysy áskerı qyzmetshilerge memlekettik nagradalar tapsyrǵan edi. 

Qasym-Jomart Toqaevtan marapat alǵandardyń arasynda jas jaýynger Shyńǵys Baqyt ta bar.

Áskerı-teńiz brıgadasynyń tank komandıri el Prezıdentinen nagrada alatynyna sońǵy sátke deıin senbegenin aıtady.

— Bir juma buryn «Astanaǵa barasyń, Joǵarǵy Bas Qolbasshydan medal alasyń» dep aıtty. Biraq men keshegi kúnge deıin senbedim. Keshe óz kózimmen kórgennen keıin ǵana ras ekenin túsindim, — deıdi Shyńǵys Baqyt.

Sarbazdyń áskerdegi qyzmetiniń aıaqtalýyna bir aıǵa da jetpeıtin ýaqyt qaldy. Dese de, ol jaýyngerlik mindetin áskerden keıin de jalǵastyrsam degen nıette.

— Áskerı boryshymdy ótep jatqanyma 11 aı boldy. Áskerdegi ómirim tym tez ótti. Munda kelgenime múlde ókinbeımin. 11 aı — 11 saǵat sekildi óte shyqty. Qazir Aqtaý qalasyndaǵy 25744 áskerı bóliminde Otan aldyndaǵy boryshymdy atqaryp jatyrmyn. Buıyrsa, 20 kúnnen keıin úıde bolamyn. Biraq aldaǵy ýaqytta áskerı qyzmetti kelisimshart negizinde jalǵastyrý oıda bar, — deıdi jaýynger.

Sarbazdar shebine óz erkimen suranyp kelgen Shyńǵys Baqyt áskerı ómirdiń artyqshylyqtaryn tizip berdi.

— Negizi áskerdiń paıdasy óte kóp. Eń birinshi kezekte, sen munda ómirlik dos tabasyń. Ekinshiden, men tank júrgizemin, atamyn. Ol nárseni qarapaıym ómirde oryndaý múmkin emes qoı. Ásker bizge osyndaı múmkindik beredi. Úshinshi paıdasy — bul dıstsıplına. Kóp nárseni óz ýaqytynda isteýge úırenesiń. Negizi aıta berseń, jaqsy jaqtary kóp, — deıdi sarbaz.

41 tonnalyq tehnıkany basqaratyn tank komandıri óz jumysynyń qyr-syryn baıandady.

— Tank degen — ol 41 tonnalyq úlken jaýyngerlik tehnıka. Oǵan 3 adam otyrady: mehanık-júrgizýshi, kózdeýshi-operator jáne tank komandıri. Úsheýiniń de atqaratyn qyzmeti óte úlken. Olar bir-birinsiz jumys isteı almaıdy. Mehanık júrgizýshi tankti júrgizedi. Kózdeýshi-operator nysanany kózdeıdi. Al komandır ekıpajǵa baǵdar berip otyrady. Men — tank komandırimin. Tank negizinen eki bólshekten turady: mehanık otyratyn jáne kózdeýshi men komandır otyratyn bólik. Mehanık tek aldyn ǵana kóre alady. Kózdeýshi tanktiń munarasyn qalaı bursa, sol jerdi ǵana kóredi. Al men 360 gradýsta kóre beremin. Sebebi, meniń aldymda arnaıy basqarý paneli turady. Sol tanktiń aınalasyn 360 gradýsqa kórsetedi, — deıdi ol.

Tank komandıri áskerı is-qımyl kezinde tank qyzmetiniń mańyzyn túsindirdi.

— Tankısterdi eń áýeli arnaıy apparattarda oqytyp, jattyqtyrady. Seni birden shynaıy tankke otyrǵyzbaıdy. Bastapqyda arnaıy trenajerlarda úıretedi. Birinshi júrgizip kóresiń, sosyn atyp kóresiń. Ekeýin de jaqsy istep jatsań, seni tank komandıri qyzmetine taǵaıyndaıdy. Tank áskerı nysandardy joıýǵa, qarsylyq shabýyl jasaýǵa jáne ózge tanktermen urys júrgizýge arnalǵan. Qudaı saqtasyn, árıne, jaý kele jatsa, aldyńǵy shepte qalǵan bolyp biz shyǵamyz, — deıdi Shyńǵys Baqyt.

Aıta keteıik, Astanada ótken áskerı paradqa el óńirinen soǵys ardagerleri keldi.