Áskerdi shyǵarý Aýǵanstanmen ara-qatynastaǵy jańa bastamaǵa aınalmaq – NATO
BRıÝSSELЬ. QazAqparat – Sársenbi kúni Brıýsseldegi Soltústik atlantıkalyq alıansy Aýǵanstan boıynsha blokqa múshe elder qorǵanys mınıstrleriniń arnaıy málimdemesin jarııalady, dep habarlaıdy QazAqparat tilshisi.
2001 jyly NATO boıynsha odaqtas elder Alıans tarıhynda birinshi ret Vashıngton kelisim-shartynyń 5-babyn qoldanyp, Aýǵanstanǵa naqty maqsattarmen kontıngentin jibergen edi: «Al-Kaıdaǵa» jáne 11 qyrkúıek kúni Qurama Shtattarǵa shabýyl jasaǵandarǵa qarsy turý, sonymen qatar lańkesterdiń Aýǵanstandy kelesi shabýyldaryna pana retinde paıdalanýyn boldyrmaý.
Keıingi on jyldyqta óz qanymyz ben quraldarymyzdy aıamaı, Aýǵanstan Islam Respýblıkasy jáne onyń qaýipsizdik kúshterimen áriptestikte osy maqsattarǵa jetý úshin jumys istedik.
Aýǵanstan sheshýi tıis máselelerdiń áskerı sheshimi joq ekenin moıyndaı otyryp, «Batyl qoldaý» Mıssııasynyń kúshterin 2021 jyldyń 1 mamyrynda shyǵarýdy uıǵardyq.
Bul operatsııa biryńǵaılanǵan, úılestirilgen jáne aldyn ala josparlanǵan. Barlyq amerıkalyq jáne «Batyl qoldaý» Mıssııasy kúshterin shyǵarýdy birneshe aı ishinde aıaqtaýdy josparlap otyrmyz.
Osy operatsııa barysynda odaqtas áskerlerge talıbterdiń kez kelgen shabýyly batyl jaýappen qarsy alynady.
«Batyl qoldaý» NATO Mıssııasynyń aıaqtalýy beıbitshilik jolyndaǵy saıası progresti óńirlik jáne halyqaralyq qoldaýdy jandandyrý aıasynda júzege asyrylyp otyr. Aldaǵy ýaqytta biz aýǵandyqtardyń óz basshylyǵymen jalǵasyn taýyp jatqan beıbit protsesti qoldaıtyn bolamyz.
NATO Ystanbul konferentsııasyn Dohada jetken beıbit protsesti ilgeri jyljytý jáne ózgeristi turaqtandyrý múmkindigi retinde qarsy alady. Biz aýǵan bıligi men «Talıban» qozǵalysyn amerıkalyq-talıbtik kelisim men Ortaq amerıkalyq-aýǵandyq deklaratsııa bastaǵan beıbit protsess boıynsha óz mindettemelerin ustanýǵa shaqyramyz.
NATO odaqtastary men seriktesteri aldaǵy ýaqytta da Aýǵanstandy, onyń halqyn jáne ınstıtýttaryn sońǵy 20 jylda jetken jetistikterdi qorǵaý jáne qaýipsizdikti nyǵaıtý jolynda qoldaıtyn bolady. Áskerdi alyp shyǵý Aýǵanstanmen ara-qatynastyń úzilgenin bildirmeıdi. Bul jańa bastama bolmaq.
Aýǵanstandaǵy turaqty álem beıbit kelisim negizinde zorlyq-zombylyqty toqtatyp, barlyq aýǵandyqtardyń, ásirese áıelder, balalar men azshylyqtyń quqyqtaryna kepildik berip, zańdy qoldap, Aýǵanstannyń endigári lańkesterge pana bolmaıtynyn bildiredi.
NATO Aýǵanstanda jumys isteý úshin tarıhynda eń úlken koalıtsııa jınady. Bizdiń áskerlerimiz Aýǵanstanǵa birge kirdi, birge qyzmet etip, endi birge ketip barady.
Osy mıssııaǵa qatysqandarǵa, aýǵan qaýipsizdik kúshterine alǵys aıtamyz. Sonymen qatar osy maqsatta qurban bolǵandardy qurmetteımiz, delingen NATO habarlamasynda.
