Áskerden jaltarǵandarǵa ákimshilik jáne qylmystyq jaýapkershilik kúsheıtildi

ASTANA. QazAqparat - 2015 jylǵy 1 qańtardan bastap merzimdi áskerı qyzmetten jaltarǵandarǵa qarsy jaýapkershilik arttyryldy. Soǵan oraı, Ákimshilik quqyq buzýshylyq kodeksi men Qazaqstan Respýblıkasynyń qylmystyq kodeksine ózgertýler men tolyqtyrýlar engizildi. Bul týraly búgin Ortalyq kommýnıkatsııalar qyzmetinde ótken brıfıngte QR Qarýshy Kúshteri Bas shtaby Uıymdastyrý-jumyldyrý jumystary departamenti bastyǵynyń orynbasary - jasaqtaý basqarmasynyń bastyǵy polkovnık Amantaı Óserbaev málim etti.

Jańa Qylmystyq kodekste áskerı boryshyn óteýden jaltarǵany úshin jazalaý sharalary kúsheıtildi. Atap aıtqanda, zań buzýshylarǵa aqshalaı aıyppul salýmen qatar, áskerge shaqyrýdan júıeli túrde bas tartqan azamattardy qamaýǵa alý jazasy qarastyrylǵan.

"Áskerden jaltarǵandarǵa 1 myń AEK nemese 1,8 mln. teńge aıyppul jáne qylmystyq jaýapkershilik qarastyrylǵan. Alaıda bizdiń elde bundaı oqıǵalar tirkelgen emes. Azamattarymyz zańǵa moıynsunady jáne shaqyrtý túsken jaǵdaıda ýaqytynda keledi", - dedi ol.

​Bıyl Qorǵanys mınıstrliginiń basshylyǵy qoıǵan tapsyrmalarǵa sáıkes jergilikti áskerı basqarý organdary kelisimshart boıynsha áskerı qyzmetshiler men merzimdi áskerı qyzmet jaýyngerleriniń araqatynasy 80 % de 20% quraıtyndyǵyn atady. Ótken jyly bul araqatynas 70% te 30% quraǵan bolatyn.

Jergilikti atqarýshy organdardyń sheshimi boıynsha áskerge shaqyrý naýqany kezinde azamattardy dárigerlik kýálandyrýdy qamtamasyz etetin shaqyrý jáne medıtsınalyq komıssııa qurylady.

Esterińizge sala ketsek, merzimdi áskerı qyzmetke shaqyrý Qazaqstan Respýblıkasynyń «Áskerı qyzmet jáne áskerı qyzmetshilerdiń mártebesi týraly» Zańyna sáıkes jylyna eki márte ótkiziledi. Bıyl áskerge shaqyrý 1 sáýirden bastalady. Jalpy 2015 jyly 29 myńnan astam er azamattar merzimdi áskerı qyzmetke shaqyrylýǵa jatady.

Qazaqstan Respýblıkasy Qarýly Kúshteri qataryna 4 myńǵa jýyq azamattardy áskerge shaqyrý josparlanýda, al qalǵan azamattar Qazaqstan Respýblıkasy Memlekettik kúzet qyzmeti, Qazaqstan Respýblıkasy Ulttyq ulany men Qazaqstan Respýblıkasy Ulttyq qaýipsizdik komıteti shekara qyzmetiniń áskerı bólimderine jiberiletin bolady.

Zamanaýı talaptaǵy áskerge shaqyrylýdyń ereksheligi - onyń ashyqtyǵy. Bul eń aldymen qoǵam ókilderiniń shaqyrý komıssııasynyń jumysyna qatysýy arqyly júzege asyrylady.