Áskerden jaltarǵandar 1 jylǵa sottalýy múmkin

ASTANA. KAZINFORM — Qarýly kúshteri Bas shtaby Uıymdastyrý-jumyldyrý jumysy departamenti bastyǵynyń orynbasary Farhat Aıdarbaev ortalyq kommýnıkatsııalar qyzmetinde ótken baspasóz máslıhatynda áskerden jaltarǵandarǵa qylmystyq kodekste qandaı jaza qarastyrylǵanyn eske saldy. 

Aıtýynsha, merzimdi áskerı qyzmetke shaqyrtýdan bas tartqany úshin zańnamada qylmystyq jáne ákimshilik jaýaptylyq kózdelgen.

— Ákimshilik quqyq buzýshylyq týraly kodekstiń 647-babynda áskerı esepte turǵan nemese turýǵa mindetti azamattyń jergilikti áskerı basqarý organynyń shaqyrýy boıynsha kórsetilgen merzimde dáleldi sebepsiz kelmeýi 5 aılyq eseptik kórsetkish (19 660 teńge) mólsherinde aıyppul salýǵa ákep soǵady.

Osy kodekstiń 648-babynda áskerge shaqyrý komıssııasynyń joldamasy boıynsha medıtsınalyq kýálandyrýdan ne tekserilýden jaltarǵany úshin áskerge shaqyrylýshylarǵa eskertý jasaýǵa ne 3 AEK (11 796 teńge) mólsherinde aıyppul salýǵa ákep soǵady.

Qylmystyq kodekstiń 387-babyna sáıkes áskerı qyzmetten bosatýǵa zańdy negizder bolmaǵan kezde jaltarý bir 1000 AEK-ke deıingi (3 mln 932 myń teńge) mólsherde aıyppul salýǵa ne sol mólsherde túzeý jumystaryna, ne 400 saǵatqa deıingi merzimge qoǵamdyq jumystarǵa tartýǵa, ne bir jylǵa deıingi merzimge bas bostandyǵyn shekteýge, ne sol merzimge bas bostandyǵynan aıyrýǵa jazalanady, — dedi Farhat Aıdarbaev.

Sondaı-aq, ol áskerge barmaý úshin óz densaýlyǵyna qasaqana zııan keltirý, «aýrýmyn» dep jalǵan qujat jasaý sııaqty áreketter qatań jazalanatynyn eskertti.

Buǵan deıin 28 tamyzda Qazaqstanda resmı túrde kúzgi áskerge shaqyrý naýqany bastalǵanyn jazǵan edik.