Áskerden oralǵan sarbazdarǵa JOO-dan 1 040 oryn bólindi

ASTANA. KAZINFORM – 2025 jyldyń kúzinde ásker qataryna shaqyrylǵan merzimdi áskerı qyzmetshilerge joǵary oqý oryndarynan 1 040 oryn bólindi. Onyń 800-i memlekettik bilim berý granty bolsa, 240-y kúshtik qurylymdardyń joǵary oqý oryndaryndaǵy oryndar.

 Áskerden oralǵan sarbazdarǵa JOO-dan 1 040 oryn bólindi
Foto: QR Qorǵanys mınıstrligi

QR Qorǵanys mınıstrligi baspasóz qyzmetiniń habarlaýynsha, bul másele Astanada ótken vedomstvoaralyq komıssııa otyrysynda qaraldy.

Jıynǵa Qorǵanys mınıstriniń tárbıe jáne ıdeologııalyq jumystar jónindegi orynbasary, general-maıor Asqar Mustabekov, Qorǵanys mınıstriniń kómekshisi – Bas ınspektor Aıgúl Tólembaeva, Áskerı bilim jáne ǵylym departamentiniń bastyǵy, polkovnık Murat Oljabaev qatysty.

 Áskerden oralǵan sarbazdarǵa JOO-dan 1 040 oryn bólindi
Foto: QR Qorǵanys mınıstrligi

Sondaı-aq otyrysqa Іshki ister mınıstrligi Ulttyq ulanynyń, Ulttyq qaýipsizdik komıteti Shekara qyzmetiniń, Tótenshe jaǵdaılar mınıstrligi men Memlekettik kúzet qyzmetiniń ókilderi qatysty.

Bólingen 1 040 orynnyń 800-in Ǵylym jáne joǵary bilim mınıstrligi memlekettik grant túrinde usyndy. Qalǵan 240 oryn kúshtik qurylymdardyń joǵary oqý oryndaryna tıesili.

Áskerı bilim jáne ǵylym departamenti bastyǵynyń orynbasary, maıor Lıýdmıla Perıakınanyń aıtýynsha, úmitkerlerdi irikteý «Srochnıkı 2.0» platformasy arqyly tsıfrlyq formatta ótkizilgen.

 Áskerden oralǵan sarbazdarǵa JOO-dan 1 040 oryn bólindi
Foto: QR Qorǵanys mınıstrligi

– Jas azamattar úshin bul – áskerı qyzmetin aıaqtaǵannan keıin bilimin jalǵastyryp, suranysqa ıe mamandyqty meńgerýge berilgen jaqsy múmkindik. Úmitkerlerdiń reıtıngin qalyptastyrý kezinde jaýyngerlik daıarlyq nátıjeleri, áskerı tártip deńgeıi, qyzmettik mindetterin oryndaý sapasy, psıhologııalyq daıarlyǵy jáne testileý qorytyndylary eskerildi. Osy kórsetkishter negizinde jaýyngerlik saıystyń qorytyndysy boıynsha bilim berý granttaryna ıe bolǵandar anyqtaldy, – dedi maıor Lıýdmıla Perıakına.

Konkýrstyq irikteýge 160 áskerı bólimnen 8 823 áskerı qyzmetshi qatysty. Baıqaý qorytyndysy men jeńimpazdardyń sertıfıkattary «Srochnıkı 2.0» platformasynda jarııalandy.

-Qorǵanys mınıstrliginiń áskerı qyzmettiń bedelin arttyrýǵa baǵyttalǵan bul bastamasy zańnamalyq turǵydan bekitilgen. Joǵary oqý oryndaryna túsetin áskerı qyzmetshilerge qosymsha áleýmettik kepildikter qarastyrylǵan. Atap aıtqanda, oqýdyń alǵashqy jylynda jataqhanadan basymdyqpen oryn beriledi jáne shákirtaqy tólenedi,-delingen habarlamada.

 Áskerden oralǵan sarbazdarǵa JOO-dan 1 040 oryn bólindi
Foto: QR Qorǵanys mınıstrligi

Jobany iske asyrýǵa Quryltaı depýtattary Nurgúl Taý men Oljas Quspekov te qoldaý kórsetti. Olar bilim berý jeńildikterin engizýge qatysty praktıkalyq máselelerdi sheshýge atsalysqan. Depýtattar eńbek naryǵynda suranysqa ıe mamandyqtar boıynsha bilim berý baǵyttarynyń tizimin keńeıtýdi de qoldap otyr.

Qazir merzimdi áskerı qyzmetin aıaqtaǵan jastardy daıarlaý bes baǵyt boıynsha júrgiziledi. Olar – aqparattyq-kommýnıkatsııalyq tehnologııalar, ınjenerlik jáne qurylys mamandyqtary, aýyl sharýashylyǵy jáne bıoresýrstar, veterınarııa, sondaı-aq qyzmet kórsetý salasy.

Osyǵan deıin elimizde Prezıdent tapsyrmasy boıynsha keshendi áskerı reforma bastalǵany týraly jazdyq.