Áskerden keıingi bilim: 1000-nan astam qazaqstandyq grant ıegeri atandy

ASTANA. KAZINFORM – Elordada zapasqa shyqqan áskerı qyzmetshilerge joǵary oqý oryndarynda tegin bilim alýǵa arnalǵan sertıfıkattar tabystaldy. Nátıjesinde myńnan astam qazaqstandyq memlekettik grant ıegeri atandy.

Saltanatty rásim Erkeǵalı Rahmadıev atyndaǵy memlekettik akademııalyq fılarmonııada ótti. Іs-sharaǵa Qorǵanys mınıstrligi men Astana qalasy qorǵanys isteri jónindegi departament basshylyǵy, Parlament Senatynyń depýtattary, áskerı qyzmetshiler, ardagerler men jastar qatysty.

– Bul sertıfıkat – senderdiń adal qyzmetterińniń laıyqty jemisi. Osy múmkindikti aldaǵy ýaqytta senimdi ósip-órkendeý úshin tıimdi paıdalana bilińder, – dedi Qorǵanys mınıstriniń orynbasary general-maıor Asqar Mustabekov.

Saltanatty jıynda Senat depýtaty Ǵalıasqar Sarybaev ta quttyqtaý sóz sóılep, áskerı qyzmettiń jastar ómirindegi mańyzyn atap ótti. Sonymen qatar áskerı qyzmetshilerdiń týystary da memleket tarapynan kórsetilgen qoldaýǵa rızashylyq bildirdi.

Grant ıegerleriniń qatarynda L.N. Gýmılev atyndaǵy Eýrazııa ulttyq ýnıversıtetinde oqýǵa joldama alǵan kishi serjant Beıbarys Hasen bar.

– Men úshin bul áskerdegi basty jetistigim. Komandırlerim men jaqyndaryma qoldaý kórsetkeni úshin alǵysymdy bildiremin, – dedi ol.

Qorǵanys mınıstrliginiń málimetinshe, «Sarbaz 2.0» jobasy aıasynda áskerı boryshyn ótegen azamattarǵa UBT tapsyrmaı-aq joǵary oqý oryndaryna túsý múmkindigi beriledi. Sonymen qatar úzdik sarbazdarǵa jataqhana men shákirtaqy qarastyrylǵan.

2023–2025 jyldary júıede 180 myńnan astam áskerı qyzmetshi tirkelip, olardyń ishinde «Kóktem–2025» shaqyrylymy boıynsha 18 myńnan astam adam grant alǵan. Bilim granttary túrli kúshtik qurylymdar arasynda bólingen.

Qazirgi tańda «Sarbaz 2.0» jobasy jastarǵa bilim alý men kásibı damýǵa jol ashatyn tıimdi tetikke aınaldy.

Aıta keteıik, buǵan deıin Qorǵanys mınıstrligi áskerı qyzmetshilerdi negizinen qandaı mamandyqtarǵa baýlıtyny habarlandy.