Áskerden keıin bilim grantyn alǵandar qandaı mamandyqtardy tańdady
ASTANA. KAZINFORM — Qazaqstanda belgilengen merzimdi áskerı qyzmetin ótegen 1 745 azamatqa elimizdiń joǵary oqý oryndarynda bilim alý úshin memlekettik bilim berý granttary berildi, dep habarlaıdy Qorǵanys mınıstrliginiń baspasóz qyzmeti.
Eń kóp suranysqa ıe aqparattyq tehnologııalar bolyp otyr. Bul mamandyqty 234 adam, ıaǵnı grant ıegerleriniń 13,4 paıyzy tańdaǵan. Ekinshi orynda — orman sharýashylyǵy. 136 adam (7,8%) bolashaq mamandyǵyn tabıǵatty qorǵaý salasyna arnaǵysy keledi. Úshinshi orynda 134 adammen (7,7%) kommýnıkatsııalar jáne kommýnıkatsııalyq tehnologııalar mamandyǵy tur. Al taǵy 119 adam (6,8%) aqparattyq qaýipsizdik baǵytyn tańdaǵan.
Joǵary oqý oryndary arasynda Qazaq ulttyq agrarlyq zertteý ýnıversıteti kósh bastap tur. Munda 156 grant ıegeri (8,9%) bilim alýǵa nıet bildirgen. L. N. Gýmılev atyndaǵy Eýrazııa ulttyq ýnıversıtetin 144 adam (8,3%) tańdaǵan. Úshinshi oryndy ál-Farabı atyndaǵy Qazaq ulttyq ýnıversıteti men M. Áýezov atyndaǵy Ońtústik Qazaqstan ýnıversıteti bólisti. Olardyń árqaısysyna 134 adamnan (7,7%) túsken.
Memlekettik bilim berý granty ıegerleriniń biri — Álıhan Jambylov. Ol aqparattyq qaýipsizdik mamandyǵyn tańdaǵan.
— Aqparattyq qaýipsizdik mamandyǵyn sanaly túrde tańdadym. Búginde tsıfrlyq tehnologııalar barlyq salada qoldanylady. Sondyqtan aqparatty qorǵaý salasy mamanyna suranys joǵary. Áskerı qyzmetti ótegennen keıin grant alý múmkindigi men úshin úlken yntalandyrý boldy. Endigi mindetim — sapaly bilim alyp, bilikti maman ataný, — dedi Álıhan Jambylov.
Áskerı qyzmetshilerdi irikteý «Srochnıkı 2.0» tsıfrlyq jobasy aıasynda júrgiziledi. Merzimdi qyzmet barysynda áskerı qyzmetshiniń tsıfrlyq reıtıngi qalyptastyrylady. Onda jaýyngerlik daıarlyq nátıjeleri, áskerı tártibi jáne basqa da kórsetkishteri eskeriledi. Reıtıng qorytyndysy boıynsha aqparattyq júıe bilim berý granttaryn avtomatty túrde bóledi. Bul irikteý úderisiniń ashyqtyǵyn qamtamasyz etip, adamı faktordyń yqpalyn boldyrmaıdy.
2024 jyly merzimdi áskerı qyzmetshilerge shákirtaqy tólenetin memlekettik bilim berý granttaryn alý jáne jataqhanadan oryn berýde basym quqyqqa ıe bolý múmkindigi zańnamalyq turǵyda bekitildi. Sonymen qatar belgilengen merzimdi áskerı qyzmetin ótegen azamattar tikeleı áskerı qyzmet barysynda ótken irikteý nátıjeleri boıynsha joǵary áskerı oqý oryndaryna túsý múmkindigine ıe.
Bilim alýǵa beriletin jeńildikter merzimdi áskerı qyzmettiń bedelin arttyrýǵa baǵyttalǵan sharalardyń biri sanalady. Olar jastardyń zapasqa shyqqannan keıin bilim alyp, kásibı turǵydan damýyna qosymsha múmkindik beredi.
Buǵan deıin memlekettik grantta oqyǵan túlekterge qoıylatyn talaptar ózgergenin jazǵanbyz.
