Áskerden kelgen jastardy 40-tan astam JOO tegin oqytýǵa daıyn

ASTANA. QazAqparat – Merzimdi áskerı qyzmetin ótkergen jastardy jeńildik berilgen tártippen 40-tan astam JOO oqytýǵa daıyn. Bul týraly QR Qorǵanys mınıstriniń keńesshisi Aıgúl Tólembaeva aıtty, dep habarlaıdy QazAqparat tilshisi.

Aıta keteıik, QR Qarýly kúshteriniń quralymdary qatarynda merzimdi áskerı qyzmetin ótkergen azamattar úshin JOO-ǵa túsýdiń jeńildikteri qarastyrylǵan.

«Qazirgi ýaqytta Qorǵanys mınıstrliginiń áskerı qyzmetshilerge bilim berý jeńildikterin engizý bastamasyn elimizdiń 40-tan astam jetekshi joǵary oqý orny qoldady», - dedi Aıgúl Tólembaeva Ortalyq kommýnıkatsııalar qyzmetindegi baspasóz máslıhatynda.

Osy oraıda ol tıisti kelisim aıasynda JOO-lar 100 paıyz jeńildik beretinin aıtty.

«Atap aıtqanda, merzimdi áskerı qyzmet ótkergen azamattardy oqytý úshin úsh myń oryn berý jóninde kelisimge qol qoıyldy», - dedi mınıstrdiń keńesshisi.

Budan buryn habarlanǵandaı, sarbazdardyń áskerı qyzmet aıaqtalǵannan keıin UBT-ny eskermesten eki jyl ishinde aqyly negizde JOO-ǵa oqýǵa túsý múmkindigi bar.

Ekinshiden, jaýyngerlik daıarlyqta, júktelgen mindetterdi oryndaýda joǵary nátıjege qol jetkizgen jáne úlgili áskerı tártibimen erekshelengen áskerı qyzmetshilerge UBT tapsyrmaı-aq, JOO esebinen oqý quqyǵy beriledi.

Budan ózge, oqý ornynyń áskerı kafedrasynda emtıhansyz tegin oqýǵa bolady. Atap aıtqanda, merzimdi áskerı qyzmetin ótep shyqqandar qatardaǵy jaýynger bolady.

Al eger ofıtser shenin alǵysy kelse, olar áskerı kafedrada bilim alyp, leıtenant atanady.

Atalǵan jeńildikterdi paıdalaný úshin jastar tıisti qujattardy joǵary oqý oryndaryna tapsyrýy kerek.