Áskerdegi shynaıy ómirdi kórgen soń odan bas tartatyndar da bar- Seıitkerim Arapbaev
AQTÓBE. QazAqparat - Aqtóbe oblysynda áskerge shaqyrylǵandar «Aqsuńqar» apparaty arqyly arnaıy psıhologııalyq test tapsyrady. Testten múdirmeı ótkendenderdiń ózi keıde bir kún ótken soń bárinen bas tartyp jatady. Bul týraly Aqtóbe oblystyq Qorǵanys isteri jónindegi departament bastyǵy Seıitkerim Arapbaev aıtty, dep habarlaıdy QazAqparat tilshisi.
Aqtóbe oblysy áskerge shaqyrý jumystary kezinde jospardy túgel oryndap keledi. Máselen, bıyl 900-den astam jas Otan aldyndaǵy boryshyn óteýge attandy. Olarǵa kýálik bermes buryn arnaıy komıssııa tekserýden ótkizdi. Quramynda teologtary men din ókilderi, úkimettik emes uıym músheleri men jaýapty memlekettik, áskerı qyzmetkerleri bar komıssııa aldymen óz erkimen baratyndarǵa basymdyq beredi.
«90 jyldary áskerı boryshyn óteýden qashatyndar boldy. Qaıta qurý kezinde azamattardyń patrıottyq sana-sezimin tárbıeleý qıyn bolǵan edi. Qazirgi kezde ondaı problema joq. Degenmen densaýlyǵyna baılanysty áskerı boryshyn óteı almaıtyndar bar. Sonymen qatar aýdan, aýylda muǵalim bolyp jumys istep júrgen er adamdar kadr tapshylyǵy máselesine baılanysty Otan aldyndaǵy boryshyn óteýdi keıinge shegerip jatady. Din ókilderi de merzimin shegere alady. Keıde jas jigitterdiń analary kelip, balasynyń nesıe alǵanyn aıtady. Bul azamattar rezervte turady. Keıin shaqyrylady. Múlde áskerge barýdan bas tartqan adam joq. Eger bas tartsa, materıaldy sotqa beremiz. Ol kezde 2 mıllıon teńgeden astam aıyppul tólep, túrmege qamalýy múmkin. Din óńir úshin óte kúrdeli suraq. Ulttyq qaýipsizdik komıteti, teologtarmen jumys isteımiz. Komıssııa quramynda oblystyq din isteri basqarmasynyń ókili de bar. Sol jerde ózderi azamttarmen suhbattasady. Jalpy bizde áskerge shaqyrǵan jastar arasynan saqal ósirip, barmaımyn degen jastar baıqalmady. Olar áskerge alynsa, boryshyn ótep júrgende namaz oqymaıdy»,- dedi Aqtóbe oblystyq Qorǵanys isteri jónindegi departament bastyǵy Seıitkerim Arapbaev.
Aqtóbeden shaqyrylýshylar «Aqsuńqar» apparaty arqyly psıhologııalyq test tapsyrady. Quny 5 mıllıon teńge turatyn apparatty qorǵanys departamentine jergilikti ákimdik alyp bergen.
«Test tapsyrǵan kezde azamattar tekserýden múltiksiz ótedi. Keıin áskerı bólimge barǵan kezde myńnan biri syr beredi. Áskerı bólimge baryp, sarbazdyń ómirin kórgen azamat bir kún ótken soń bárinen bas tartyp jatady. Tártip, ereje, ata-anasy janynda joq. Teledıdardan kórgen áskerı ómir basqa, naǵyz ómirdegi áskerı bólim ómiri bólek»,- dedi S.Arapbaev.
Aıta keteıik, Aqtóbe oblysy boıynsha bıyl 956 jigit áskerı boryshyn óteýge attandy. Olar elimizdiń tórt áskerı bóliminde Otan aldyndaǵy boryshyn ótep jatyr. Kóktemde barlyǵy 9 myńnan astam jigit shaqyrylsa, onyń 243-i áskerı komıssarıatqa kelmeı qalǵan. Shaqyrylǵandardyń 900-den astamy áskerı boryshyn óteýge ýaqytsha daıyn emes bolyp shyqty.
