Áskerdegi sarbazdardyń nesıeleri 13 aıǵa toqtatylady

ASTANA. QazAqparat – Bankter armııada merzimdi boryshyn ótkerip júrgen sarbazdardyń nesıelerin toqtatady, dep habarlaıdy QazAqparat Qorǵanys mınıstrligine silteme jasap.

Atalǵan kelisim merzimdi qyzmettegi sarbazdarǵa qarjylyq mindettemeleri boıynsha aı saıynǵy tólemderin 13 aıǵa keıinge qaldyrýǵa múmkindik beredi. Budan basqa, qyzmet ótkerý kezeńinde kredıtorlar bereshekti óndirip alý boıynsha sotqa ister jáne notarıýsqa ótinishter berýdi toqtatady.

Elimizdiń barlyq óńiriniń áskerge jınaý pýnktilerinde áskerge shaqyrylýshylarda kredıtter men qaryzdardyń bolýy týraly aqparat jınaý jumystary júrgizilip jatyr. Nesıeleri bar jastar jergilikti áskerı basqarý organy basshysynyń atyna qaryz alýshynyń ataýyn, tólenýge tıisti somany jáne qaryzdy tóleýge baılanysty basqa da derekterdi kórsete otyryp ótinish beredi.

Qaryzdyń bar ekendigi týraly habarlap úlgermegen sarbazdar bul máseleni bólimniń basshylyǵyna jazbasha ótinish berý arqyly sheshe alady. Bul rette jergilikti áskerı basqarý organynyń atyna berilgen týystarynyń ótinishteri de qaralady.

Alynǵan málimetter retteýshige beriledi. Óz kezeginde QR Qarjy naryǵyn retteý jáne damytý agenttigi áskerge shaqyrylǵan sarbazdarǵa negizgi borysh pen syıaqy boıynsha tólemderdi keıinge qaldyrý qajettigi týraly qarjy mekemelerin habardar etedi.

Áskerı boryshyn aıaqtaǵan soń jastar jeńildikterdi paıdalanyp, joǵary oqý ornyna UBT tapsyrýsyz túse alatynyn da aıta ketelik. Bul rette kózge túsken sarbazdar joǵary oqý ornynyń granty esebinen aqysyz oqýǵa túse alady.