Áskerdegi sarbaz óliminiń aldyn ala sebebi anyqtaldy
«4 maýsym kúni UQK Shekara qyzmeti Mańǵystaý oblysy boıynsha departamentinde merzimdi qyzmet áskerı qyzmetshisi T. óz-ózine qol jumsady. Quqyq qorǵaý organdary qajetti tergeý amaldaryn júrgizip jatyr. Aldyn ala aqparat boıynsha sýıtsıdtiń sebebi áskerı qyzmet ótkerýmen baılanysty emes, otbasylyq-turmystyq máseleler ekendigi anyqtaldy. UQK Shekara qyzmetiniń basshylyǵy men jeke quramy áskerı qyzmetshiniń týystaryna jáne jaqyndaryna qaıǵyryp kóńil aıtady. Qaza tapqan áskerı qyzmetshiniń otbasyna qajetti kómek kórsetiledi», - delingen UQK baspasóz qyzmetinen berilgen málimette.
Buǵan deıin áleýmettik jelide Mańǵystaý oblysynda shekara qyzmetinde merzimdi áskerı boryshyn ótep júrgen Edil Baqytuly Teshebaevtiń asylyp qalǵany týraly jazbalar shyqqan bolatyn. Onda marqumnyń 2003 jylǵy ekeni jáne ata-anasynyń Túrkistan oblysy Saryaǵash aýdanynda turatyny aıtylǵan.
Sondaı-aq sarbazdyń qaıǵyly oqıǵa aldynda jazǵan hattary qosa jarııalandy.
Aıta keteıik, Prezıdent Qasym-Jomart Toqaev Qazaqstan armııasyndaǵy áskerı qyzmetshiler arasynda ólim-jitimniń jıilegenine erekshe nazar aýdaryp, osyndaı keleńsizdikterdiń sebebin tergep-tekserý, áskerı qyzmetshiler arasyndaǵy zańsyzdyqtardy joıý jáne keleshekte mundaı teris is-áreketterdi boldyrmaý úshin óziniń kómekshisi – Qaýipsizdik Keńesiniń hatshysy Ǵızat Nurdáýletovtiń basshylyǵymen arnaıy komıssııa qurýdy tapsyrǵany habarlandy.
