Áskerdegi jańa baǵyt: Jambylda 120 azamat dron operatory atanady
ASTANA. KAZINFORM — Jambyl oblysynda 120 áskerı mindetti ushqyshsyz ushý apparattarynyń operatory mamandyǵyn meńgeredi, dep habarlaıdy Qorǵanys mınıstrliginiń baspasóz qyzmeti.
Jıyndar tarıhynda alǵash ret rezervtegiler dástúrli áskerı daıarlyqtyń negizgi kýrsyn meńgerýmen qatar, drondardy basqarýdy da úırenedi.
Bul jıyndardy ótkizý úshin 14157 áskerı bólimi kezdeısoq tańdalǵan joq. Atalǵan bólim ushqyshsyz ushý apparattarymen jumys isteýge mamandanǵan. Zapastan shaqyrylǵan azamattardy oqytýǵa tájirıbeli nusqaýshylar tartylǵan.
Bir aılyq jıynǵa Taraz qalasy men Jambyl aýdany, Jýaly aýdany jáne Baızaq aýdanynyn 120 azamat keldi. Qabyldaý pýnktinde áskerı mindettiler tirkeýden ótip, qujattary rásimdeledi, qajetti zattarmen jáne áskerı kıimmen qamtamasyz etiledi.
— Bul jıyndardyń ereksheligi — rezervtegiler tek bastapqy áskerı daıyndyqtan ótip qana qoımaı, drondardyń qurylymyn jáne olardy basqarý negizderin de meńgeredi. Bizde jeke quramdy qabyldaýǵa tolyq daıyndyq jasalǵan, oqý alańdary men shatyrly lager jabdyqtalǵan, — dedi 14157 áskerı bólimi komandıriniń tárbıe jáne ıdeologııalyq jumystar jónindegi orynbasary podpolkovnık Álimjin Qýantaı.
Jergilikti áskerı basqarý organdary bul jıyndarǵa áskerı mindettilerdi erekshe muqııat iriktegen.
— Bizdiń mindetimiz azamattardy sapaly irikteý, durys aqparat berip, jıyn ótetin orynǵa jetkizý boldy. Shaqyrylǵandardyń arasynda fermerler, júrgizýshiler, ınjenerler, zańgerler men býhgalterler bar. Olardyń barlyǵy shaqyrýdy durys daıyndyqpen qabyldady, — dedi Jambyl oblysy Qorǵanys isteri jónindegi departamentiniń jumyldyrý resýrstaryn taǵaıyndaý bóliminiń bastyǵy polkovnık Almas Chýnkýnov.
Otyz kún ishinde olar qaıta daıarlyqtan ótip, sonyń ishinde drondardy basqarýdy úırenedi.
— Bul baǵyt maǵan óte qyzyq. Qazirgi ýaqytta eldi zamanaýı tehnologııalardyń kómegimen qorǵap úırený qajet. Oqýǵa daıynmyn, sondyqtan jıynǵa esh qarsylyqsyz shyn yqylaspen keldim, — dedi Jýaly aýdanynan kelgen áskerı mindetti azamat Raýan Saparbaı.
Osylaısha, áskerı mindettilerdi daıarlaý júıesi urys alańyndaǵy ózgeristerge saı qarqyndy túrde jańaryp keledi. Sebebi ýaqyt ótken saıyn ushqyshsyz ushý apparattary operatorlarynyń jumysy úlken mańyzǵa ıe bolyp otyr.
Buǵan deıin áskerge shaqyrtý habarlamasyn elemegenderge qandaı shara qoldanylatynyn jazǵanbyz.
