Áskerdegi taǵy bir ólim: Saryózekte qatardaǵy jaýynger mert boldy
ASTANA. KAZINFORM – Qatardaǵy jaýyngerdiń ólimine qatysty qylmystyq is qozǵaldy. Bul týraly Ratel.kz habarlaıdy.
– 2025 jyldyń 14 qańtarynda saǵat 12:30 shamasynda № 12740 áskerı bólimniń (Saryózek) merzimdi áskerı qyzmetshisi, qatardaǵy jaýynger Qurmanbek Dastan Maratuly (týǵan kúni: 04.06.2006 j.) AK-74 qarýymen júrek tusyna oq atty. Sarbaz sol jerde qaıtys boldy. Ol 2024 jyldyń 19 qazanynda Túrkistan oblysy Maqtaaral aýdanynyń Qorǵanys isteri jónindegi departamenti arqyly áskerge alynǵan, - delingen habarlamada.
Keıin atalǵan agenttik Saryózek áskerı garnızonynan resmı túsinikteme alǵan.
– Daladaǵy jattyǵý barysynda merzimdi áskerı qyzmetshiniń atys qarýyn qoldaný erejelerin buzý saldarynan keýdesinen jaraqat alǵany anyqtaldy. Qylmystyq is qozǵaldy. Oqıǵanyń sebepteri anyqtalýda, tergeý is-sharalary júrgizilýde, qurlyq áskerleriniń bas qolbasshysynyń basshylyǵymen arnaıy komıssııa taǵaıyndaldy. Qurlyq áskerleriniń basshylyǵy qaza tapqan sarbazdyń otbasyna jáne jaqyndaryna shyn júrekten kóńil aıtady, kómek kórsetiletin bolady, - dep jazylǵan aqparatta.
Kazinform agenttigi istiń mán-jaıyn bilý maqsatynda Qorǵanys mınıstrligine resmı saýal joldady.
Aıta ketsek, bul áskerdegi birinshi ólim emes, byltyr qarashada Aqtóbe oblysynda sarbaz ózine qol salǵan edi.
Sonymen qatar ShQO-da merzimdi qyzmettegi áskerı qyzmetshi qaza boldy.
Eske sala keteıik, 2022 jyly Memleket basshysy armııada ólim-jitimniń jıileýine baılanysty komıssııa qurýdy tapsyrdy.