Áskerdegi sarbazdyń ata-anasymen júzbe-júz tildesýine múmkindik týady

ASTANA. KAZINFORM – Qazaqstan Armııasynda armia.kz mobıldy qosymshasy iske qosylady. Bul týraly Qorǵanys mınıstrligi Tárbıe jáne ıdeologııalyq jumys departamentiniń bastyǵy, ádilet polkovnıgi Tileýhan Basqojaev aıtty.

- Taıaýda mınıstr Joǵarǵy bas qolbasshyǵa bizdiń aqparattyq portalymyz - armia.kz mobıldi qosymshasyn tanystyrdy. Bul qosymshanyń múmkindikteri óte mol. Mobıldi qosymshany IOS, Android operatsııalyq júıesi bar barlyq telefonǵa júktep alýǵa bolady. «Shynaıy» ýaqyt rejımde anasy, jaqyndary sarbazdyń jaýyngerlik daıyndyqtan bos kez kelgen ýaqytynda onymen, komandırimen tildese alady, – dedi ol Ortalyq kommýnıkatsııalar qyzmetindegi brıfıngte.

Onyń dereginshe, mobıldi qosymshany Ulttyq qorǵanys ýnıersıtetiniń áskerı-ǵylymı vzvod áskerı qyzmetshileri ázirlep shyqqan. Oǵan jasandy ıntellekti elementteri de engizilgen.

Buǵan deıin áskerde júrgen sarbazdyń nesıesin toqtatý úshin ata-ana ne isteý kerektigin jazǵan edik.